Chibvumirano chakanyoreranwa pakati pemutungamiri weAmerica, VaDonald Trump, nemutungamiri weNorth Korea, VaKim Jong Un, chiri kuonekwa nenzira dzakasiyana siyana nemaseneta pamwe nevakuru vakuru muhurumende yeAmerica.
Vamwewo vanoti chibvumirano ichi hachina kubudisa pachena zvinofanirwa kuitwa mukubvisa zvombo zve nuclear muNorth Korea.
Vamwevo vanoti zvakawiriranwa mavambo ekupedza hurongwa hwezvombo izvi.
Nyanzvi munyaya dzezvematongerwo enyika, Doctor Rhoderick Machekano, vanoti hapana chitsva chakaitika, zvikuru kubva kudivi reNorth Korea nokuti zvavakavimbisa svondo rino, ndizvo zvavagara vachingovimbisa pavakataura nemutungamiri weSouth Korea.
VaMachekano vanoti havana kunzwa chimwe chitsva kubva kuna VaKim.
"Tinoona sekuti VaKim ndivo vane zvavakawana kana tikaenzanisa neAmerica isina chitsva chayakambovimbiswa," vadaro VaMachekano
Facebook Forum