Vakadomwa nehurumende kuti vatungamire bara rekumutsiridza kambani yemarasha yeHwage Colliery, VaBekithemba Moyo, vanogona kutongwa nemhosva yekushora paramende mushure mekunge varambidza mabharani mukuru wekambani iyi, VaAllan Masiya, kuti vape humbowo kuparamende maererano nemashandiro aiita kambani iyi.
Sachigaro wekomiti yeNational Assembly inoona nezvemigodhi nezvicherwa, VaTemba Mliswa, vakaudza VaMoyo kuti komiti yavo ine humbowo hwekuti VaMoyo vakarambidza VaMasiya kumira pamberi pekomiti yavo.
Vati vane gwaro rakanyorwa naVaMoyo uyewo pane humwe humbowo huchanzikwa neMuvhuro svondo rinouuya hunoratidza kuti VaMoyo vakashorawo nhengo dzeparamende kuti hadzina simba pamusoro pebasa ravo rakavakapihwa nehurumende kuHwange
VaMliswa vakayambira VaMoyo kuti paramende ine simba rekukoka ani nani zvake kuraparamende. VaMoyo vakasetsawo nhengo dzekomiti iyi apo vakatai vakatanga basa vasina kana gwaro rekuratidza kuti vainge vapihwa basa.
Vakati vari kushandisa gwaro reGovernment Gazette kuita basa ravo uyewo varamba kutaura kuti vachabhadharwa marii pabasa ravari kuita.
Zvichakadai gurukota rezvemutemo, VaZiyambi Ziyambi, vakati danho ravakatora rekumutsiridza kambani yeHwange vakaritora zviri pamutemo uye mushure mekunge vagutsikana nezvikonzero zvainge zvataurwa negurukota rezvemutemo VaWinston Chitando.
Vakatiwo vese vane chekuita nekambani iyi vachakokwa kunopa humbowo pamberi pemutongi wedare reHigh Court, uyo anotarisirwa kupa mutongo wekuti danho ravakatora riri pamutemo here kana kuti kwete.
Izvi zvino tarisirwa kuitwa mukati memazuva makumi matatu kubva padomwa VaMoyo nechikwata chavo.
Asi VaMliswa zviri kuitika kuHwange zvinoratidza pachena kuti zvido zveveruzhinji nenyika hazvisi kukosheswa.
Vati gurukota rezvemigodhi, VaChitando pachavo, vaive sachigaro weHwange Colliery vasati vave gurukota uye matambudziko ari kuHwange aiveko panguva yavo asi hapana kumbotorwa danho rekuti kambani iyi imutsiridzwe.
Zvichitevera danho rakatorwa nehurumende, kambani yeHwange Colliery yakamiswa pamusika wemakambani weZimbabwe Stock Exchange uye inotarisirwa kumiswawo kuita basa pamisika yeJohannesburg Stock Exchange neLondon Stock Exchange.
Zvichakadai mune imwewo nyaya mumwe mukuru wekumahofisi emutungamiriri wenyika, VaDouglas Tapfuma, nezuro vakaramba kuti vakashanda nemumwe muzvina bhizimisi, VaShepherd Tundiya, mukuvhundutsira nhengo dzebhodhi reHwange.
Nhengo dzebhodhi reHwange dzakaudza komiti yaVaMliswa kuti VaTundiya vainge vava tyityidzira vakatoenda navo kuState House uko vakanosangana naVaTapfuma.
Asi nezuro VaTundiya vakaramba kuti vakakoka nhengo dzebhodhi reHwange KuState House vachiti sachigaro vebhodhi reHwange Amai Muskwe ndivo vainge vakumbira kubatsirwa kunoona mutungamiri wenyika VaEmmerson Mnangagwa.
Asi Amai Muskwe vataura kuti VaTundiya ndivo vainge vava vofenera vachiti vaida kuonekwa nemutungamiri wenyika
Nhengo dzekomiti iyi dzayambira VaTundiya kuti havasi kuzobvumidzwa kushandisa zita remutungamiriri mumabasa avo.
Vatiwo zviripa chena kuti VaTundiya havasi kutaura chokwadi.
Mumiriri weBikita West VaElias Musakwa ndemumwe akataurira VaTundiya kuti vanofanira kutaura chokwadi kwete kunyepera paramende.
VaMliswa vatiwo komiti yavo iri kuda kuchenura zita remutungamiriri wenyika.
Komiti iyi yakaita chisungo chekuti VaTundiya vauye zvekare kudare iri nemusi weMuvhuro unotevera vakagadzirira kupindira mubvunzo yese ine chekuita nemashandire avaiita nekambani yeHwange.
VaMliswa vakati komiti yavo iri kuongorora nyaya yeHwange nekuti inoda kuona kuti zvido zvevashandi zvachengetedzwa uye kuti kambani iyi yatanga kushanda zvakare kuti ibatsire nyika.
Hurumende ine zvikamu makumi matatu nezvinomwe mukambani yeHwange kozotiwo vamwe zviuru zvina ndivo vane zvimwe zvikamu zvasara mukambani iyi.
Kambani iyi ine zvikwereti zvinodarika mamiriyoni mazana mana uye danho rakatorwa nehurumende rinoreva kuti haigoni kusungiswa nekuda kwezvikwereti izvi.
Facebook Forum