Hurumende yeZimbabwe yazvisudurudza pamashoko evakafanobata chigaro chemurongi wemisangano muZanu PF, VaPatrick Chinamasa, avo vakashoropodza nhepfenyuro yeStudio7 vachiti inhepfenyuro ine ruvengo neZimbabwe uye yakafanana nezvirango zvakatemerwa Zimbabwe.
Vachibvunzwa neStudio 7 kuti mashoko aVaChinamasa avakataura pamuzinda weZanu PF muHarare nemusi weChina, anoreva here pamire hurumende yaVaEmmerson Mnangagwa, gurukota rezvekubudiswa kwemashoko, Amai Monica Mutsvangwa, vanoti mashoko akataurwa naVaChinamasa haana kubva kuhurumende, nokudaro Studio7 inofanirwa kunzwa kuna VaChinamasa mbune kuti mashoko avo aireveyi.
Studio7 haina kukwanisa kunzwa kuna VaChinamasa sezvo vanga vasiri kudaira nharembozha yavo.
Bepanhau repaindaneti reNew Zimbabwe rakaburitsa nyaya iyi nezuro richiti VaChinamasa vakashoropodza nhepfenyuro yeStudio7 pamusangano wavakaita nevatori venhau nemusi weChina vachiti inhepfenyuro ine ruvengo nehurumende yeZimbabwe.
Mashoko aVaChinamasa aya akoknzera kuti sangano reMisa Zimbabwe rishushikane zvikuru.
Sachigaro weMisa-Zimbabwe, VaGolden Maunganidze, vati havawirirane nemashoko aVaChinamasa ekuti Studio 7 imhandu yehurumende.
VaMaunganidze vatiwo vezvematongerwo enyika vanofanirwa kuziva mabasa evatori venhau kwete kuvapinza mune zvematongerwo enyika.
Rimwe gweta rinomiririra vatori venhau, VaChris Mhike, vatiwo mashoko aVaChinamasa anovafungisa kushungurudzwa kwevatori venhau panguva yehutongi hwemushakabvu VaRobert Mugabe.
Vati vane tarisiro yekuti hurumende yaVaMnangagwa icharemekedza kushanda kwakasununguka kwevatori venhau sezviri mubumbiro remitemo yenyika.
VaMhike vati nhepfenyuro yeStudio 7 ine vatori venhau muZimbabwe avo vanofanirwa kushanda vakasununguka pasina kutyityidzirwa nevematongerwo enyika.
VOA inoti mukuchengetedza zvisungo zvayo, zvirongwa zveStudio7 ndezvechokwadi, hazvina kwazvinorerekera uye zvine hudzamu. Yatiwo zvirongwa zveVOA Zimbabwe zvinoramba zvichivimbwa nazvo neveruzhinji uye zvinoburitsa nhau dzechokwadi pamwe nekuita hurukuro uye kunzwa pfungwa dzenyanzvi dzinobatsira mukusimudzira budiriro muAfrica , muAmerica nepasi rose.
Facebook Forum