MDC inotungamirwa naVaNelson Chamisa inoti tsamba iri kutenderera pa social media ichiti munyori mukuru webato iri, VaDouglas Mwonzora, vambomiswa basa, haisi yechokwadi.
Mutauririri waVaChamisa, Doctor Nkululeko Sibanda, vanoti tsamba iyi ndeyemanyepo uye aya mabasa eZanu-PF ekuda kuparadza bato ravo.
Doctor Sibanda vati VaChamisa naVaMwonzora vari kushanda vese zvakanaka mukusimbaradza bato ravo.
“Zanu-PF ndiyo yakanyora tsamba yenhema iyi nekuti tinoziva kuti ine hurongwa hwayakaisa mari yakawandisa kuti ikuvadze MDC nekuparadzanisa hutungamiri hwayo mumwedzi mitanhatu,” Doctor Sibanda vaudza Studio7.
“Uye zvekuti VaChamisa naVaMwonzora vanofarirana here hazvina basa. Chinokosha ndechekuti musangano uri kuenderera mberi,” vadaro VaSibanda
Studio7 haina kukwanisa kunzwa kumutauriri weZanu PF kuti tinzwe divi rayo.
Mugwaro ranyorerwa kuvatori venhau, vanoona nezvekufambiswa kwemashoko mubato re MDC Alliance vati bato ravo ibato rakasimba rine mirairo yekuita hurukuro uye yekusvitsa zvichemo kunzeve dzevanotarisa zvichemo zvevatsigiri naizvozvo mabasa ekuparadza akaita setsamba iyi haazombokwanisi kukanganisa bato iri kana kuribudisa mugwara.
Facebook Forum