Chikwata cheChicken Inn nemusi weMuvhuro chakasimudza mukombe weIndependence Trophy mushure mekukunda chikwata cheHighlanders 2-1.
Mumutambo wekutsvaga chikwata chinenge chiri pachidanho chechitatu nechechina, chikwata cheFC Platinun chakakunda chikwata che Dynamos 2-0
Mune mimwe mitambo, nemusi weChipiri, makundano echipfumbamwe emutambo werugby evechidiki epasi rose eUnder 20 World Cup ari kupfungaidza hutsi muHarare.
Zvikwata zvese zvisere zviri mumakundano aya zvave muHarare zvichimirira kutanga kwemitambo masikati apo Zimbabwe ichange ichisangana neSamoa. Zimbabwe iri muGroup A, gungano rimwe chete zvekare neUruguay neFiji.
Zimbabwe inofanira kukunda mumutambo uyu kuitira kuti vanotevera rugby varambe vachitevera makundano aya kusvika kumagumo.
Muongorori wezvemutambo werugby, VaMemory Machridza, vanoti semaonero avo Zimbabwe ichabudirira mumutambo wavo wekutanga neSamoa uyo uchange uri muHarare Sports Club.
VaMachiridza vanoti maYoung Sables akaita gadziriro yakasimba zvekuti vanoona kunge chikwata ichi chakabatana.
Rimwe gungano reGroup B rinewo zvikwata zvina zvakaita seUSA, Spain, Namibia, neHong Kong.
Zvikwata zviviri kubva mugungano rega rega ndizvo zvinoenderera mberi nemakundano aya. Fainari yemakwikwi aya ichatambirwa muNational Sports Stadium musi wa1 Chivabvu.
Totarisa mutambo wegorofu. Zviuru zvevanhu nemusi weSvondo zvaive muRoyal Harare Golf Club kuzoona vatambi vekuSouth Africa vachirura mumakundano eZimbabwe Open Golf tournament ayo akatambwa kwemazuva mana.
Mutambi wekuSouth Africa, VaLyle Rowe, ndivo vakatora mukombe wakakosha uyu pamwe nemari inoita iyo zviuru mazana maviri namakumi masere nemanomwe zvemaranzi mushure mekunge vapedza makomba ake ese nemaponzi anoita iwo 11 under par 277.
Mutambi wemuZimbabwe asi achigara kuUSA, Scott Vincent, ndiye ega munyika akakwanisa kuve pavatambi gumi vekutanga asi aive ari kure nemukombe sezvo akapedza ari pachinhanho chechishanu.
Mutambi wemuZimbabwe aitevera ndi Mark Williams uyo aive kure zvikuru ari pachinzvimbo chemakumi matatu Ave makore matanhatu akateverana mukombe wemuZimbabwe uyu uchienda kuSouth Africa.
Mutambi wemuZimbabwe wekugumisira kutora mukombe uyu ndi Marc McNulty uyo akatora mukombe uyu muna 2010.
Asi vatambi wemutambo uyu muZimbabwe vanoti makundano aya ari kuuya vasina kuita gadziriro yakakwana sezvo anoitwa apo mwaka wegorofu unenge usati watanga muZimbabwe sekutaura kwaVaEnio Katembenuka.
VaTich Musemburi avo vasina kutamba zvakanaka mumakundano eZimbabwe Open aya vanoti makundano akaramba ari mashoma muZimbabwe sezvaari pari zvino, hapana chinobuda muZimbabwe Open.
Vamwe vatambi vemuZimbabwe vakakwikwidza vanoti Ryan Cairns akapedza ari pachinhanho chemakumi mana nematatu kuchitiwo Kierren Vincent akapedzawo ari pachinzvimbo chemakumi mana nesere.
Makundano eZimbabwe Open anounganidza vatambi zana nemakumi mashanu kubva kunyika dzakasiyana siyana pasi rose.
