Vanhu gumi nevaviri vakafa munjodzi yemumugwagwa wekuBeitbridge vamwe makumi mana nevashanu vakakuvara mushure mekunge bhazi reMB Transport rabonderana nerori.
Bhazi iri, iro raibva kuHarare rinonzi rakatanga rarova dhongi rainge riri mumugwagwa risati raroverana nerori iri. Njodzi iyi yakaitika makiromita makumi matatu nemashanu kubva kuguta reBeitbridge.
Mugwagwa weHarare-Beitbridge uyu unofamba nemabhazi nemarori anotakura zvinhu waurayisa vanhu vakawanda zvikuru uye hurumende iri kushorwa zvakanyanya nekutadza kuugadzirisa.
Makurukota ehurumende anoti rezvematunhu VaSaviour Kasukuwere uye vanoona nezve vasori VaKembo Mohadi vashanyira paitikira njodzi iyi vakavimbisa kuti hurumende ichapa mazana maviri emadhora kubatsira vanhu vafirwa.
Munyori weguta reBeitbridge VaLoud Ramagkopola vanoti vari kushushikana zvikuru nenjodzi dziri kuitika mumugwagwa uyu nekuti wapedza vanhu.
