Rimwe sangano rinorwira kodzero dzevanhu, reZimbabwe Activists Alliance rinoti rino katyamadzwa nedanho ratorwa nemapurisa rekushevedza nhengo dzaro kumusangano weJoint Operation Command kana kuti JOC, uyo unonzi uchaitwa neChina masikati.
Sangano iri rakanga ranyora tsamba kumapurisa richiazivisa nezvehurongwa hwenhengo dzaro hwekuda kufora mumigwagwa neMugovera dzichicherechedza zuva rerudo, reValentine’s Day.
Vanoona nezvekufambiswa kwemabasa musangano iri, Muzvare Tendai Lynnette Mudehwe vanoti neChipiri vakasvitsa tsamba yavo kudivi remapurisa rePolice Internal Security Intelligence (PISI) vachi vazivisa nezvehurongwa hwavo hwekufora mumigwagwa pazuva iri senzira yavo yekuratidza rudo rwavo kunyika yavo yeZimbabwe.
Vanoti dingindira regore rino rinoti “I Love my Zimbabwe”.
Musangano weJOC uyu unopindwa nemapurisa, mauto, vasori pamwe nevanoona nezvekuchengetedzwa kwemajeri.
“Isu tichaenda kumusangano weJOC uyu mangwana, uye tichaenderera mberi nekuratidzira kwedu neMugovera, zvisineyi nekuti tapiwa mvumo here nemapurisa kana kuti kwete,” Muzvare Mudehwe vanodaro.
Vanoti pasi pebumbiro remitemo yenyika, vanhu vanobvumirwa kuungana vachiratidzira, uye kuzivisa kwavo mapurisa hakusi kutsvaga mvumo asi kuti kuitira kuti vabatsirwe mukukwanisa kuti vanhu vafambe zvakanaka pamwe nekuchengetedza runyararo.
