Mutungamiri wenyika, VaEmmerson Mnangagwa, nhasi vavhura Harare Agricultural Show, zviri pamutemo vachiti nzira dzekurima dzinofanira kuvanduzwa kuitira kuti goho rirambe richikura izvo zvino simudzira hupfumi wenyika.
Vachivhura zviri pamutemo Harare Agricultural Show yegore rino, VaMnangagwa vati kurima ndiwo musimboti wehupfumi hwenyika nekudaro zvakakosha kuti mabasa ekurima atsigirwe zvakasimba.
Vati hurumende yavo icharamba ichitsigira zvirongwa zvekurima zvakaita seNational Enhanced Agricultural Scheme, Pfumvudza/Intwasa pamwe nechirongwa chePresidential Rural Horticulture and Livestock Program.
Vatiwo varimi vekumaruwa vanofanira kutsigirwa senzira yekupedza hurombo munzvimbo idzi. Vatiwo varimi ava vakakosha sevamwe varimi pakuvandudza goho pamwe nekutengesa kunze kwenyika.
VaMnangagwa vati Show yegore rino inoratidza pachena zvinokwanisa kuitwa nevarimi vekumaruwa kana vakawana rutsigiro sevarimi veku Bubi neLupane.
Vatiwo hurumende yavo iri kuvaka madhamu mumaruwa izvo zvichaiti kuti varimi munzvimbo idzi vatange madiridziro ayo anoita kuti vawane goho rakakura.
VaMnangagwa vakurudzira varimi kuti vakagadzirire mwaka unotevera zvakasimba kuitira kuti pabude goho rakakura kudarika regore rino sezvo nyanzvi dzemamiriro ekunze dziri kuti mwaka uyu uchange uine mvura yakawanda.
Vatendawo Zimbabwe Agricultural Society (ZAS) nekuronga Show yegore rino vachiti inopa mukana wekudyidzana nekupangana mazano pakati pevarimi nevamabhizimisi.
Vatiwo maShow anofanirwa kuitwawo mumatunhu neWard senzira yekusimudzira nekusimbaradza hukama hwevarimi nemabhizimisi.
VaMnangawa vatambidzwawo mibairo kuvarimi nemakambani akakunda pazviratidzwa zvegore rino.
Varimi vawana mibairo vanosanganisira Amai Chipo Chamura vekuMashonaland Central avo vatora mubairo wepamusoro pakurima fodya naVaBafundi Mpofu vekuZvishavane avo vatora mubairo wepamusoro pavarimi vanochengeta mombe.
Kambani yeSeedCo ndiyo yatora mubairo wepamusoro pamakambani anoita zvekurima kozoti Zimplats ndiyo yatora mubairo wepamusoro pamambani anoita zvekuchera zvicherwa.
Bazi rinoona nezvekurima ndiro rakunda makambani ese ari kuratidzira paShow yegore rino uye rapihwa mubairo weBest Overall Exhibitor.
Mutungamiri weZAS, VaNgoni Kudenga, vati zvinofadza kuti vakaronga Show yegore rino paita goho rakanaka izvo zvinoreva kuri mabasa ekurima achasimudzira hupfumi hwenyika.
Makambani mazana maviri nevarimi zana vari kuratidzira paHarare Agricultural Show yegore rino, iyo ichapera nemusi weMugovera.
Facebook Forum