Sangano rinomiririra varairidzi, re Progressive Teachers Union of Zimbabwe (PTUZ), rinoti ragumbuka zvikuru negurukota rinoona nezvemari, VaMthuli Ncube, avo vanonzi vakapamhidzira mari kune vamwe vakuru vakuru vanoshanda muhurumende asi pasina chavapa varairidzi.
Mutungamiriri wesangano iri, Doctor Takavafira Zhou, vaudza Studio 7 kuti varairidzi vakagara vasingabvumi kuti hurumende haina mari.
Vati chave kudiwa nesangano ravo ndechekuti hurumende ibudise pachena mari inotambirwa nevashandi vese vehurumende sezvo zviri pachena kuti hurumende inopa vamwe mari ichinyima vamwe.
Doctor Zhou vati sangano ravo riri kukurukura nyaya yekuti varairidzi vaende kubasa zuva rimwe chete pasvondo, kwete mazuva matatu seavari kushanda ikozvino vachiti varairidzi havana mari yekuendesa kubasa.
Facebook Forum