Chikwata cheHighlanders chiri kuda kupedza nhomba yemakore matanhatu chisina kutora mukombe mukuru apo chiri kupinda mufainari yeChibuku Super Cup neNgezi Platinum Stars muBarbourfields Stadium neMugovera.
Chikwata ichi chakapedzisira kutora mukombe une zita guru muna 2013 apo Highlanders yakatora mukombe weMbada Diamonds Cup.
Kubvira ipapo vateveri vechikwata ichi vanga vachishushikana nekuona chikwata chavo chichitatarika kwete mumitambo yeligi chete, asi nemumitambo yemikombe zvekare.
Asi kusvika kwemurairidzi Henrik Pieter de Jong weku Netherlands mwaka uno kwashandura zvinhu mumusha weHighlanders iyo isati yakundwa mumitambo gumi nemitatu iyo De Jong anga ari panyanga.
Pamusoro pezvo, De Jong aunza manyawi muvatambi vake zvekuti Prince Dube ari kukanda zvibodzwa pamadiro, ukuwo Nqobizitha Masuku achibika zvibodzwa izvi pakati penhandare.
Izvi zvayeuchidza veruzhinji mazuva eHighlanders ekare, mazuva evatambi vakaita saRahman Gumbo, Peter naAdam Ndlovu, Willard Khumalo nevamwe vakambotambira chikwata ichi munguva yachaibhebha moto.
Mumwe muteveri wemutambo wenhabvu, VaNoel Masiyazi, vanoti mukombe watove mukabati yeHighlanders, vachiti ivo Bosso ine mwongo wakanyanyisa kudarika Ngezi Platinum Stars.
Vamwewo vakaita savaOliver Usongoro ndivo vanoti Highlanders ichakunda nekuti ichange iri pamusha sezvo fainari iyi iri kutambirwa muBarbourfields Stadium.
Asi vatsigiri veHighlanders havafanire kupembera mutambo usati wapera sezvo, “Madamburo” ichizivikanwa nekukwanisa kupedza mufaro wasimuka mukamba yeBosso uyu.
Chikwata chekuMhondoro-Ngezi ichi chakambotora mukombe uyu muna 2016, uyezve murairidzi wacho mutsva Rodwell Dhlakama ari kudawo chekuratidza kuti apihwe basa iri zvachose.
Pavatambi vakaita saDonald Teguru, Tatenda Machisa, Quadr Amini, Michelle Katsvairo naTichaona Mabvura, Dhlakama ane vatambi vanokwanisa kutakura mukombe kudzoka nawo kuMhondoro-Ngezi.
Mumwe muteveri wemutambo wenhabvu, VaKudzai Bere, vanoti Highlanders haifanirwe kudheerera Ngezi nekuti yakadaro inokwanisa kuzoyeuka dumba yanaiwa.
Kukunda kweBosso kana Madamburo kunoreva kupinda mumakwikwi emuAfrica gore rinouya sezvo chikwata chinotora mukombe weChibuku Super Cup chichinomirira nyika muCaf Confederation Cup.
Pamusoro pezvo, chikwata chinokunda chiri kuwana mari inoita iyo zviuru mazana maviri nemakumi maviri nezvishanu zvemadhora emunyika.
Facebook Forum