Mutungamiri weMDC, VaMorgan Tsvangirai, vanoti bato ravo rave kuenda kumatare kuti rinomisa gurukota rezvematunhu, VaSaviour Kasukuwere, avo vanonzi vari kuda kudzika komisheni kuti iwone nezvekufambiswa kwezvinhu muguta reHarare.
Nekune rumwe rutivi, meya we Harare, VaBenard Manyenyeni, vambomiswa basa naVaKasukuwere vachipomerwa mhosva yekupinza munyori weguta mutsva zvisiri pamwero.
VaTsvangirai vaudza vatori venhau pamuzinda webato ravo ravo paHarvest House kuti sebato vatora danho rekuti vakwidze nyaya iyi kumatare sezvo vachiti zviri kuda kuitwa naVaKasukuwere, pamwe nezvavari kuita zviri kunze kwemitemo.
Va Kasukuwere vanoti vari kuda kubvisa makanzura emu Harare akasarudzwa nevanhu vomatsiva nekomisheni nepamusana pekuti vanoti vakapfurikidza mwero pavakapa Va James Mushore basa rekuva munyori weguta, kana kuti town clerk.
VaTsvangirai vanoti VaKasukuwere vave kupinza zvematongerwo enyika panyaya isinei nezvematongerwo enyika.
Vaenderera mberi vachiti vaneta nekusatevedzera murawu kunoitwa nevakuru-vakuru muhurumende vakashora mukuru wemauto, Va Constantine Chiwenga, avo vakabuda mumapepanhau mazuva mashoma adarika vachiti mauto anodyidzana nebato reZanu PF vachiti izvi zvinhu zvisingabvumirwe nebumbiro remitemo yenyika kuti vari muchiuto vapindire munyaya dzezvematongerwo.
VaManyenyeni vaudza Studio 7 parunhare kuti vatambira tsamba kubva kuna VaKasukuwere yekuvamisa basa vachipomerwa mhosva yekusavateerera panyaya yekupa basa kwavakaita VaMushore avo vanonzi nekanzuru ndivo vavakawona vane magwaro akakodzera kuti vapihwe basa raTown Clerk.
Makakatanwa ari kuitika pakati peZanu PF ne MDC agara achiitika kubva apo MDC yakapinda mune zvematongerwo enyika ikatora masimba ekutonga maguta nemadhorobha.
Izvi hazvina kufadza Zanu PF iyo yakatanga kutsvaga huta nemugati ichida kupomera MDC mhosva dzine chekuita nekutadza basa pamwe nehuori.
Vaimbova gurukota rezvematunhu, VaIgnatius Chombo, vakasiisa basa meya weHarare, Va Elias Mudzuri, pakaumbwa komisheni yakanga yofambisa basa muHarare.
VaChombo vakaendazve kune mamwe maguta vachidzinga makunzura eMDC vachiatsiva nemakomisheni.
Izvi ndizvo zvava kuitwa naVaKasukuwere.
