Muzinda weAmerica muZimbabwe wabvisa mari inoita mamirioni maviri nemazana mashanu ezviuru zvemadhora kuti ishandiswe mukubatsira vanhu vanoita zviuru zana nemakumi matatu nezvitatu vakavhiringwa nedutumupengo re Cyclone Idai kumatunhu eChipinge neChimanimani.
Zvimwe zvabatsirwa nazvo zvinosanganisira zviuru zviviri zvematani emapfunde, mafuta ekubikisa nezvimwe zvekudya zvinovaka muviri.
Mumiririri we America muZimbabwe, VaBrian Nichols, vati America inomira nevanhu veZimbabwe panguva yakaoma iyi.
Mari nezvekudya izvi zvatambidzwa kusangano rinobatsira vanhu nezvekudya, reWorld Food Program.
Zvichakadaro, rimwe remasangano arikubatsira mumatunhu akawirwa nenjodzi, reAngels Foundation, rinoti basa rekubatsira vanhu riri kuenderera mberi kunyangwe hazvo pane zvizhinji zvinodiwa.
Mukuru wesangano iri, VaEdmore Munyoro, vaudza Studio 7 kuti vanhu varambe vachiedza kubatsira uye tisakanganwa kuti vanhu vazhinji vanoda rubatsiro rwekutanga patsva sezvo zvese zvavakange vainazvo vasisina.
Facebook Forum