Pane kusawirirana mubato reZanu-PF pamusoro pezvokuita nedzimba dzakasiyiwa nevaimbove mutungamiriri wenyika, VaRobert Mugabe, zvikuru sei imba yavo yeBlue Roof.
Vamwe vakuru mubato iri vanoda kuti imba iyi iitwe muzinda munoiswa zvinhu zvekurangarira nazvo VaMugabe asi vamwe vachiti imba iyi, pamwe chete neimwe iri kuBorrowdale dziiswe zviripamutemo muzita remhuri ya VaMugabe.
Nhepfenyuro yeZBC inoti vanoona nezve kufambiswa kwe mabasa muZanu-PF, VaObert Mpofu, vati imba yeBlue Roof ichaita basa rinobatsira bato reZanu-PF.
Asi richinyora paTwitter paro, bazi rezvekubudiswa kwemashoko rati mutungamiriri wenyika, VaEmmerson Mnangagwa, ndivo vega vanogona kutaura pamusoro pezvinofanirwa kuitwa neimba iyi.
Vanoongorora zvematongerwo enyika vakazvimiririra, VaButler Tambo, vanoti havaoni VaMnangagwa vachitorera mhuri ya VaMugabe dzimba idzi, asi vachiti hukama pakati paVaMnangagwa nemhuri ya VaMugabe hahuchagadzirika.
Facebook Forum