Mapurisa emuHarare neChina vakasunga mutevedzeri wemupepeti mukuru webepanhau reNewsday, Nqaba Matshazi, uye mutori wenhau, Xolisani Ncube, vachipomerwa mhosva yekunyora manyepo.
Matshazi na Ncube vari kupomerwa mhosva yekunyora manyepo pasi pemutemo we Criminal Law (Codification and Reform) Act.
Vatori venhau ava vanonzi vakanyora nyaya yekuti nhengo dzesangano revasori reCentral Intelligence Organization dzainge dzapihwa mari dzemabhonasi kunyange hazvo vamwe vashandi vehurumende vasati vapihwa mari idzi.
Gweta riri kumirira vatori venhau ava, VaTaona Nyamakura, vati Matshazi naNcube vari kurara mutirongo sezvo vasina kubudirira kuendeswa kudare.
Hatina kukwanisa kubata mutauriri wemapurisa, Chief superintendent Paul Nyathi, sezvo vange vasingadaire nharembozha yavo. Hapasati pajekeswa kuti ndiyani akamhang'ara nyaya iyi kumapurisa.
Asi munyori mukuru wesangano revatori venhau reZimbabwe Union of Journalists, VaFoster Dongozi, vashora zvikuru kusungwa kwevatori venhau ava.