Vaimbova mutevedzeri wemutungamiri wenyika Amai Joyce Mujuru varamba mashoko ari mubepanhau reSunday Mail ekuti vari kuda kudzokera kubato reZanu-PF kunyangwe vaudza Studio 7 kuti havo bato iri rakambotumira nhumwa kuzovakumbira kuti vadzoke.
Vakatumirwa mutevedzeri wegurukota rezvekudzivirirwa kwenyika VaVictor Matemadanda nemumwe murwiri werusununguko VaAndy Mhlanga. Hatina kukwanisa kubata vaviri ava kuti tinzwe divi ravo.
Amai Mujuru varambawo kuti ndivo vakanyora mashoko ari kutenderera padandemutande retwitter ari kutaurawo nezvenyaya iyi vachiti havana padandemutande retwitter zvachose.
Vaenderera mberi vachitiwo muZanu-PF havana kuita zvekubuda vega asi vakaita zvekudzingwa nekudaro vanoda kuti vaite hurukuro nemutungamiri wenyika VaEmmerson Mnangagwa mbune kuti vazive chikonzero chakapa kuti vambodzingwa. Vati havangataure nevafudzi vemombe iye muridzi wadzo aripo semunhu aive mutevedzeri wemutungamitri wenyika.
Your browser doesn’t support HTML5
Hurukuro naAmai Joyce Mujuru