Vamwe vaimboshandira kambani yaichera goridhe yeFalcon Gold nemhuri
dzavo vodzingwa mudzimba dzavaigara vasati vapihwa mari dzavo
dzavakashandira kwemakore akawanda.
Kunyange hazvo mhuri dzinosvika makumi matanhatu dzakapihwa magwaro
ekuti dzibude mudzimba, pari zvino mhuri gumi neimwechete ndidzo
dzaburitswa mudzimba idzi.
Vamwe mazana mana vari kutarisirwa kupihwa matsamba ekubuda mudzimba
dzavari kugara munguva pfupi iri kutevera.
Mumwe akaburitsirwa midziyo yake panze ndi Amai Ruth Banda avo vakafirwa
nemurume ayinge ashanda pamugodhi uyu kwemakore makumi maviri
nemanomwe asi mugodhi wakazovharwa asati apihwa mari dzake.
Amai Banda vanoti vakashamisika vopihwa matsamba ekuti vabude mumba
yavo yavagara kwemakore makumi maviri nemashanu vachinzi murume wavo ayinge
apihwa mari dzake dzose izvo vanoti manyepo.
Mumwe akamboshandira Falcon Gold, VaForget Phiri, vanoti mapurisa matatu
ekambani yeRioZim iyo yave kuchera goridhe pamugodhi waive weFalcon
Gold ne mapurisa eZimbabwe Republic Police vachitungamirirwa
nemupurisa anonzi Zhou ndivo vakavakandira zvinhu zvavo panze
zvine hutsinye.
VaPhiri vanoti kupindira kwakanzura wenzvimbo iyi VaNaison Tinapi
munyaya yekuburitswa kwevanhu mudzimba vari kudivi rekambani yeRioZim
mucherechedzo wekuti kuburitswa kwevanhu mudzimba zvave zvematongerwo
enyika sezvo hurumende yakatadza kuti vanhu vapihwe mari
dzavakashandira makore akawanda.
Mumwe ari kutungamira pakurwisa kuti vanhu vasadzingwe mudzimba
dzavari kugara ndiAmai Ayisatu Phiri.
Amai Phiri vanoti chave kuvashamisa ndechekuti kambani yeRioZim
payakatenga kambani yeFalcon Gold vakavimbisa vagari ava kuti
havaizovabvise mudzimba dzavari kugara asi nhasi vapinduka vave kuti
vabude mudzimba vasati vapihwa mari dzavo.
Vakawanda vari kuburitswa mudzimba vanoti havasi kurambira mudzimba
vachiti vakapihwa mari dzavo vanotsvaga kwekuenda vakasununguka.
VaRodrick Mumba vanoti vanodzingwa chete nekambani ye Falcon Gold
yavaine chibvumirano nayo uye vapihwa mari dzavo dzose
dzavakashandira.
Kanzura wenzvimbo iyi VaTinapi vati vachataura nesu kana vapihwa mvumo
nevavasina kudoma nezita.
Asi mumiriri weChakari mudare reparamende, VaAndrew Nkati, vanoti vari kuziva
nezvenyaya iyi asi vanga vasingazive kuti vanhu vakaburitswa mudzimba.
VaNkati vanoti vashevedzera musangano wechimbichimbi nevagari ava
pamwe nevekambani yeRIOZim nhasi vachiti tizovabata kana vapedza
musangano uyu. Asi vanga vasati vapedza musangano pataenda pamhepo.
Mukuru wekambani yeRioZim pamugodhi uri kuChakari, Muzvare Blessed
Chibanda vanoti chibvumirano chekutenga mugodhi uyu kubva kuFalcon
Gold chinosanganisira dzimba nokudaro vaimbove vashandi vanofanirwa
kubuda mudzimba idzi kuti vashandi vavo vatsva vawane pekugara.
Patabvunza kuti sei vave kubvisa vanhu ava kwapera makore akawanda
mushure mekutenga kambani iyi Muzvare Chibanda vanoti zvinhu zvose
zvine nguva, vachiti vashandi vavo vainge vachiri vashoma.
Mutauriri wemapurisa mudunhu reMashonaland West , Amai Margret Chitove
vanoti vanga vasati vave kuziva kuti mapurisa avo vari mukati
mekuvhiya kahukwana nekuda kweyi.
Zvinonzi mugodhi weFalcon Gold wakavharwa mugore ra2013 mushure
mukusagadzikana munyaya dzezvehupfumi munyika asi wakatadza kubhadhara
vashandi vaisvika zviuru zviviri.
Zvinonzi varidzi vemugodhi uyu vakawirirana nevashandi ava kuti vaizogara mudzimba idzi kusvikira vapihwa mari dzavo.
Mugodhi uyu wakazotengwa neRioZim iyo inonzi yakavimbisa kuti ichachengetedza
chibvumirano chekuti vaimbove vashandi veFalcon Gold vagare mudzimba
idzi kusvikira vabhadharwa mari dzavo dzose, asi RioZim inonzi yave kudududza pachibvumirano ichi.
Chimwe chinonzi nevagari ava chave kuvarwadza ndechekuti vave kubhadhariswa mari
inotangira pamadhora makumi maviri nemanomwe emari yekuAmeriva pamwedzi
yekugara mudzimba idzi kana kuti rent.
Your browser doesn’t support HTML5
Nyya ina Nunurai Jena