America nezuro yakapa mibayiro kumadzimai gumi nemaviri kubva kuLiberia, Libya, South Africa, Brazil, Nepal, Bangladesh nedzimwe nyika mibayiro inopihwa madzimai anenge achishanda kurwisa huori, mhirizhonga yemudzimba, rusaruraganda nezvimwe kuti pasi rino rive nerunyararo.
Madzimai matatu emuAfrica akawana mibayiro anoti Amai Roegchanda Pascoe vekuCape Town South Africa vanobatsira varombo kuma Cape Flats. Amai Facia Boyenoh Harris vekuLiberia vanoshanda kusimudzira vadzidzi vanobva kdzimba dzevanononga svosve nemuromo uye Amai Najla Mangoush veku Libya vakave mudzimai wekutanga kuva gurukota rezvekudyidzana nenyika kuLibya
Mibayiro iyi inopihwa madzimai gumi nevaviri pagore negurukota rezvekudyidzana kwedzimwe nyika muAmerica VaAntony Blinken nemudzimai wemutungamiri wenyika yeAmerica Amai Jill Biden.