Vanhu vashoma vabuda kuzovhota nhasi munzvimbo dzekuvhotera idzo dzange dzisisina mitsetse yakakura mudhorobha reMasvingo, asi vakawanda vavhota
kuMwenezi East neChivi South, musarudzo dzekutsiva zvigaro zvanga zvisina vamiriri muparamende nemumakanzuru, kana kuti by-election.
Mumawadhi mana eMasvingo aitwa sarudzo nhasi anoti, 3,4,5 ne7 kwange
kusina mitsetse mikururu mangwanani kusvika masikati sezvo vanhu vange
vachiuya vari vashoma-vashoma vachivhota murunyararo.
Mitsetse midoko yangoonekwa pazvikoro zveShakashe neRujeko kuwadhi 7
asi yakurumidza kupera vanhu vakazotanga kuuya mumwe mumwe.
Vange vachiongorora sarudzo dzanhasi muMasvingo vati vakatyamadzwa
kuona vanhu vashoma vachienda kunovhota sezvo vaitarisira kuti vanhu vazhinji
vachabuda musarudzo idzi sezvavaita munguva dzekutsvaga rutsigiro.
Mumwe wevanga vachiongorora sarudzo idzi akamirira sanganore Citizens’
Action in Southern Africa(CIASA), VaProsper Tiringindi, vati sarudzo
dzaitwa murunyararo.
Mukuru anoona nezvemabasa musangano reZimbabwe Electoral Commission(ZEC),
muMasvingo , VaZex Pudurai, vati sarudzo dzafamba zvakanaka uye vanhu
vazoita vashoma mukufamba kwezuva.
Kunyangwe vanhu vashoma vange vachienda kuzovhota, vange vachikwikwidzana
vataura neStduio 7 vati vanotarisira kukunda musarudzo idzi.
Mumiriri webato reCitizens’ Coalition for Change muwadhi 3 muMasvingo, VaRocky Kamuzonda, vati vanotarisira kurakasha vari kuvakwikwidza.
Ukuwo, vari kumirira bato reZanu PF musarudzo idzi muwadhi imwecheteyo, VaTaurai Mudzviti, vatiwo ndivo vanenge vave kanzera mangwana panoziviswa zvinenge zvabuda musarudzo idzi.
Nhengo yeCCC, kuMwenezi East, VaTendekayi Mandizvidza, vatiwo
vanotarisira kukunda musarudzo dzevamiriri veparamende sezvo vanhu vazhinji vabuda kuzovhota murunyararo, kunyange pakambobuda shoko rekuti masabhuku munzvimbo mavo vainzi vaende nevanhu vavo kundovhotera bato reZanuPF.
Kunze kwesarudzo dzemakanzura mudunhu reMasvingo kwange kune sarudzo
dzevamiriri veparamende kuMwenezi East uko kwakasara kwashama
pakashaya vaiva mumiriri VaJusbee Omar ve Zanu PfF pamwe neChivi South
uko kwakadzingwa VaKiller Zivhu nebato reZanu PF.
Your browser doesn’t support HTML5
NYAYA INA GODFREY MUTIMBA
Mashoko atatambirawo kubv kudunhu reMbizo, kuKwekwe, anoratidza kuti vanhu vakawanda havanawo kuenda kunovhota kunyange hazvo misangano yaiitwa nevemapato ezvematongerwo enyika yaiona vanhu vakawanda vachibuda.