Veteveri vemutambo wekiriketi munyika vapihwa mukana wekuona fainari yeDomestic T20 pasina muripo wepagedhe wavanobvisa.
Mutauriri weZimbabwe Cricket, VaDarlington Majonga, vanoti vateveri vemutambo uyu vanofanira kubuditsa tsamba chete yehumbowo hwekuti vakabaiwa nhomba dzakakwana dzekudzivirira Covid 19 kuti vapinda kuona fainari iyi.
Asi VaMajonga vabuda pachena kuti magedhe achavharwa kana vatsigiri vanotenderwa nemitemo yeCovid 19 vangopinda munhandare iyi.
Hurumende inotendera vateveri vemitambo vasingadarike zviuru zvishanu kupinda mudzinhandare kunoona mitambo.
Fainari yeDomestic T20, iyo iri pakati peMountaeers neAlliance Health Eagles, ichange iri muHarareSports Club kutanga nguva dzekudya kwemasikati.
Alliance Health Eagles ichange ichitarisira mashiripiti kubva kuna Tinashe Kanhukamwe, Chamu Chibhabha, Kudzai Maunze, na Weasley Mandevere,kuti itore mukombe uyu.
Asi Mauntaneers iyo ine vatambi vakaita saKevin Kasuza, Shingi Masakadza, naTony Munyonga yakagadzirira zvakasimba kusimudzawo mukombe mukuru uyu.
Totarisa mutambo we rugby.
Chikwata cheZimbabwe chiri kusimudzira makundano acho e2022 Currie Cup muSouth Africa mangwana nemutambo neNorthern Free State Griffons.
Chikwata ichi, icho chiri kutungamirwa naHilton Mudariki, chichatamba mitambo mipfumbamwe kumakwikwi aya kusanganisira neKenya musi wa 9 Kubvumbi.
Vamwe vatambi vari muchikwata ichi, icho chiri kushandisa zita rekuti maGoshawks, vanosanganisira George Saungweme, Cleopas Kundiona, Connor Pritchard, John Stander naKeith Chiwara.
Zimbabwe iri kushandisa zvekare makundano aya kugadzirira makwikwi e2023 World Cup ayo iri kusangana neIvory Coast mumakota fainari.
Sachigaro veZimbabwe Rugby, VaAaron Jani, vanoti mitambo yeCurrie Cup ndiyo rwendo rwekutanga munzira yavo ye2023 World Cup.
KuSouth Africa uku, Zimbabwe ichatamba zvekare neGeorgia iyo yadongorera 2023 World Cup ichikwikwidza kuEurope.
Totarisa nhabvu …..
Zvikwata zviviri zviri kukwikwidza kutora mukombe weCastle Lager Premier Soccer League Chicken Inn neManica Diamonds zviri kusangana zvichiedzana masimba ekuona kuti mukuru ndiani muLuveve Stadium mangwana.
Chicken Inn ndiyo iri kutungamira makundano aya nemapoinzi makumi maviri nemaviri, Manica Diamonds iri pachinhanho chechina nemapoinzi gumi nemasere.
Asi pachinzvimbo chechipiri pane Dynamos iyo iri kutarisira kukunda Black Rhinos muNational Sports Stadium mangwana sekutaura kwemurairidzi wayo Tonderai Ndiraya.
Caps United iri munzira kuenda kwaMutare kunosangano neTenax muSakubva Stadium neSvondo, musi mumwecheteyo Highlanders yakananga kuGibbo Stadium kunobandana neTriangle.
Mimwe mitambo iriko yakamira seizvi …
Nemusi weMugovera Yadah vs Herentals -Baobab, FC Platinum vs Hwahwa - Mandava, Cranbourne Bullets vs Bulawayo City - Sakubva, ZPC Kariba vs Harare City - Nyamhunga.
NeSvondo Bulawayo Chiefs viri kukweshana neNgezi Platinum munhandare yeLuveve kuBulawayo.
Your browser doesn’t support HTML5
Nyaya ina Michael Kariati