Vanotungamira nhabvu munyika veZifa varikutsvaga murairidzi wechikwata chenyika chemaWarriors kunyange hazvo Zimbabwe isisatenderwi kutamba neve kune dzimwe nyika.
Vakafanobata chigaro chemutungamiri weZifa VaGift Banda vanoti sangano ravo riri kutsvaga murairidzi acharuka chikwata chemaWarriors vachigadzirira kuzodzoka munhabvu yepasi rese.
ZIFA yakaendeswa kumatare nevarairidzio vakaita saJose Claudenei Georgini aizivikanwa nekuti Valinhos uye yakatarika kubhadhara vamwe vakaita saSunday Chidzambwa, Norman Mapeza uye Callisto Pasuwa.
ZIFA ine nhoroondo yekutadza kubhadhara varairidzi vechikwata zinopa kuti igare ichiendeswa kumatare ezdimhosva ichimanikidzwa kubhadhara zvikwereti.
VaBanda vanoti vatotumira matsamba ekusheedzera musangano weZifa Board wekukurukura nezve nyaya yemurairidzi wemaWarriors iyi.
Vaimbove sachigaro weZifa Mashonaland East uyezve vaive nhengo yeZifa Board VaFrancis Zimunya Nyamutsamba vanoti zviri kuda kuitwa neZifa izvi kutambisa mari.
Vanoti nekushaikwa kwemitambo, murairidzi uyu hapana basa raenenge achiita kunze kwekutambiriswa mari akagara .
VaNyamutsamba vanopa mazano kuti panguva ino, Zimbabwe iri kuda murairidzi kana varairidzi vezvikwata zvevechidiki sezvo imba pakuvakwa ichitangira pasi ichienda mudenga
Asi Aimborairidza Masvingo United Makanyire Mugova Benjamin anoti pfungwa idzi dzakanaka zvikuru nekuti kuvaka chikwata chakasimba kunoda nguva uyezve bhora rinoda gadziriro yenguva refu.
VaBanda avo vakafanobata basa rakasiiswa VaFelton Kamambo neZifa Assembly pamwe neSports and Recreation Commission vanoti ivo pachavo varikuda murairidzi wemuno asi musangano ndiwo uchabuda nechisungo chimwechete.
Zimbabwe yakadzingwa munhabvu yepasi rese zvichitevera kupindira kwebazi rehurumende reSRC munyaya dze hutungamiri hwenhabvu apo vakadzinga bhodhi reZifa raitungamirwa naVaKamambo
Kunyange hazvo Fifa yakati Zimbabwe inodzoka chete kana VaKamambo vadzorwa pabasa, VaBanda vanoti vakanyorera sangano iri kuti risunungure chisungo ichi
Zimbabwe haisi kukwikwidza mumakundano e2023 Africa Cup of Nations umo yaive yaiswa mugungano rimwechete neLiberia, Morocco neSouth Africa.
Zvikwata zvemuno hazvisi zvekare kuzotenderwa kukwikwidza mumakundano eCaf Champions League neCaf Confederation Cup gore rinouya.