Chikwata cheZimbabwe chebhora remaoko remadzimai kana kuti netball nhasi chawana tikiti rekuenda kumafainari e2023 World Cup mushure mekunge charova Zambia mumakundano egadziriro yekuenda kumakwikwi epasi rose apera muSouth Africa.
MaGems asimudza mufaro munyika mushure mekurova Zambia 59-42 nhasi masikati ndokuwana tikiti rekuenda kumakundano e2023 World Cup, ayo achaitirwa kuDurban, South Africa.
Mukuita izvi, Zimbabwe yabatana neMalawi, South Africa neUganda pazvikwata zvina zvichanomirira Africa kumakundano epasi rese aya.
Mutambi anotambira kuAustralia, Joice Takaedza, ndiye svondo rese anga achikanda zvibodzwa kubvira musi uyo Zimbabwe yakarova Botswana, ndokuzokunda Namibia, Tanzania, uye nhasi paZambia.
Chirikunakidza ndechekuti Malawi, South Africa, Uganda neZimbabwe ndizvo zvekare zvikwata zvaive kumakundano e2019 World Cup kuLiverpool, England, uko Zimbabwe yakapedza iri pachinzvimbo chechisere.
Kaputeni wemaGems, Felistus Kwangwa, anoti vari kutarisira kunodarika zvavakaita kuWorld Cup yapera apo vari kuenda kumafainari epasi rese egore rinouya.
Vasikana vemuZimbabwe ava vari kutarisirwa kusvika muHarare mangwana mushure mesvondo rese vari kuSouth Africa vachikwikwidza muma2023 World Cup qualifiers.
Totarisa mitambo yeCastle Lager Premier Soccer League yatambwa nhasi.
Dynamos yatadza kudimbura hutungamiri hweFC Platinum iri pamusoro petafura mushure mekuita mangange 0-0 neZPC Kariba mumutambo watambirwa muNyamhunga Stadium masikati anhasi.
Chikwata chine mukurumbira ichi charamba chakasiiwa nemaponzi matanhatu mushure mekunge FC Platinum yacho yaitawo mangange 0-0 mukushanya kwayo kuNgezi Platinum Stars.
Chicken Inn iyo yanga ichiteverawo FC Platinum neDynamos yarohwawo zvekare 2-1 neBlack Rhinos iyo iri kurairidzwa naStanford ‘Stix’ Mtizwa.
Harare City yaitawo mangange 0-0 neBulawayo Chiefs izvo zvabudawo pamutambo weHwahwa neTriangle.
Mimwe mitambo yePSL iriko mangwana apo Caps United irikutarisirwa kufamba rwendo refu kunosangana neHighlanders kuBarbourfields Stadium kuBulawayo
Herentals ine Tenax musi mumwechetewo Manica Diamonds iri kusangana neCranbourne Bullets kuVengere Stadium.
Your browser doesn’t support HTML5
Nyaya ina Michael Kariati