Mitambo yeCastle Lager Premier Soccer League yatambwa neMugovera yapera seizvi; FC Platinum 2 Manica Diamonds 0; Caps United 1 Herentals 1; Chicken Inn 1 Ngezi Platinum 2; Cranbourne Bullets 3 Hwahwa 1.
Mimwe mitambo iriko neSvondo yakamira kadai. Dynamos vs Harare City - NSS;
Triangle vs Byo City - Gibbo; Tenax vs ZPC Kariba - Vengere, kuchitiwo Bulawayo Chiefs vs Black Rhinos kuLuveve.
Mune imwe nyaya yemitambo, vatsigiri vechikwata chenyika chemutambo webhora remaoko kana kuti netball chemaGems, vanoti chikwata chavo hachina kunyanyosimba zvekuti chinoda gadziriro yakasimba kuti chinokwanisa kumiramira kumakwikwi eWorld Cup uko chiri kuenda.
Vatsigiri vechikwata ichi vanoti kurakashwa kwakaitwa maGems 62-41 neMalawi kunoratidza kuti Zimbabwe haina kusimba zvekunokwikwidza zvine mutsindo kuWorld Cup uko iri kuenda.
Mumwe wevatsigiri ava, VaSostain Muzamindo, vanoti mitambo neMalawi neuyo Zimbabwe yakarohwa 60-47 neSouth Africa yakabuditsa pachena pamire MaGems chaipo.
Vakawanda vanoti MaGems anofanira kupihwa nguva refu ari mukamba achitamba nezvikwata zvine mbiri pasi rese mukuedzana masimba.
Muongorori wezvemitambo, VaMathias Kufandirimbwa, vanoti mukuedzana masimba uku, Zimbabwe inofanira kusiya tsika yekutamba nezvikwata zvavanogara vachitamba nazvo nekuti hapana chitsva chinovabatsira mugadziriro yavo.
Makundano eWorld Cup ariko munaNyamavhuvhu gore rinouya zvekuti pachiri nenguva yekusimbisa chikwata ichi.
Muzvare Vimbai Machingauta, avo vanotsigira chikwata cheCorrectional Services, vanoti vasikana ava vanofanira kutambidzwa zvese zvavanoda kushandisa mugadziriro iyi.
Murairidzi wechikwata, Ropafadzo Mutsauki, akabuda pachena kuti vari kuda rutsigiro rwakasimba panguva ino yegadziriro yavo yeWorld Cup iyi.
Zimbabwe yakabudirira kuenda kuWorld Cup mushure mekupedza iri pachinhanho chechitatu yarova Zambia 59-42 mumutambo wayo wekugumisira mumakundano ekusarudza chikwata chichamirira Africa.
Pavakapedzisira kuenda kuWorld Cup, Zimbabwe yakapedza iri pachinhanho chechisere izvo kaputeni wavo Felistus Kangwa anoti vari kuda kupfuura ipapo.
Zimbabwe iri kubatana neMalawi, South Africa neUganda kunomiririra Africa kumakwikwi ezvikwata gumi nezvitanhatu epasi rese aya.