Sangano revakarwa hondo yerusununguko rapeta musangano waro wekutanga rave pasi pebato riri kutonga reZanu PF, kumusangano wemazuva matatu wanga uri kuHarare International Conference Centre.
Mushandi mukuru muboka rezvekuburitswa kwemashoko muZanu PF, VaTafadzwa Mugwadi, vanoti musangano uyu wafamba zvakanaka chose zvinoratidza kurongeka kweboka revakarwa hondo ava, uye wabudawo nezvisungo zvakasiyanasiyana, zvinosanganisira kudoma mutungamiri weZanu PF vari zvakare mutungamiri wenyika, VaEmmerson Mnangagwa semunhu achamirira Zanu PF musarudzo.
VaMugwadi vanoti musangano uyu wasarudzawo hutungamiri hutsva huchange huctitungamira boka revakarwa hondo iri.
Vasarudzwa vanoti mutevedzeri wemunyori wevakarwa hondo, VaHeadman Moyo veku Matabeleland North, munyori anoona nezvekufambiswa kwemabasa VaRichard Chirongwe vanobva kuMashonaland Central, kuchiti vasarudzwa kuve munyori anoona nezvemari vari Amai Tsitsi Nyirenda vekuMashonaland East.
Munyori anoona nezvegwara remusangano ndaAmai Ntombiyake Ndlovu vekuMatabeleland South, kuchiti munyori wezvekuburitswa kwemashoko asarudzwa vari VaTimothy Njekete vedunhu reHarare.
VaMugwadi vanoti mutungamiri wenyika ndivo vachazodoma munyori weboka revakarwa hondo kumusangano we Politburo uchazogara.
Your browser doesn’t support HTML5
Hurukuro naVaTafadzwa Mugwadi