Bazi rezvemari rakanzura hurongwa hwedare reparamende hwekuda kutenga makombiyuta kubva kune mamwe makambani maviri emunyika mushure mekunge zvaonekwa kuti mitengo yakatarwa yakanyanyisa, izvo zvinoratidza kuti pakaitwa zvehuwori.
Tsamba yakanyorwa nemunyori mukuru mubazi rezvemari VaGeorge Guvamatanga kumunyori wedare reparamende, VaKannedy Chokuda nemusi weChitatu inoratidza kuti mushure mekunge bazi rezvemari ranzwa nezvema tender maviri aya rakatora matanho ekukanzura ma tender.
Makambani akanga apiwa basa rekutengesera paramende makombiyuta ari mutsamba yavaGuvamatanga iyi anoti ye Blinart Investments P/L iyo yakanga yanzi iwanise ma laptop zana nemakumi manomwe nematatu, 173, yakanga yachaja mari inoita US$1 602 755.77, zvichireva kuti laptop imwechete yaitengwa nekutengo unoita US$9 264.00.
Kambani yeMid-End Computers and Hardware (P/L) yakanga yanzi iwanise paramende makombiyuta makumi manomwe nemapfumbamwe, 79 erudzi rweDesktops aikosha US$243 052.36, zvichireva kuti kombiyuta imwechete yaitengwa nemari inodarika zvishoma zviuru zvitatu zvemadhora ekuamerica.
Hatina kukwanisa kunzwa kubva kumakambani aya kana kubazi rezvemari.
Asi paramende yaburitsawo mashoko ekuzviisa kure nenyaya iyi, ichiti ndiyo yakatotanga kuona kukwira kwemitengo yemakombiyuta iyi, izvo zvakaita kuti ibva yangokanzura ma tender aya.
Tsamba yanyorwawo kune veruzhinji naVaChokuda inoti paramende inotarisisa zvikuru hurongwa hwezvose zvainotenga, uye chiitiko ichi mumwe mukana wekuti iwedzere nekusimbisa mashandiro ainoita.
Sachigaro wekomiti yeparamende inoona nezvemari kana kuti Public Accounts Committee, VaBrian Dube, vari nhengo yebato reMDC, vanoti sekomiti yeparamende vanofadzwa zvikuru nekubatwa kwehuwori hwakadai, vachiti vose vane chekuita nenyaya iyi vanofanirwa kuongororwawo.
Your browser doesn’t support HTML5
Hurukuro naVaBrian Dube