Nyika dziri musangano remubatanidzwa wenyika dziri kuchamhembe kweAfrica reSADC dzakatarisirwa kubatana neZimbabwe mangwana dzichikurudzira kuti zvirango zvakatemerwa vamwe vakuru-vakuru muhurumende yeZanu PF zvibviswe.
Asi mamwe masangano evarairidzi munyika anoti haasi kufara nehurongwa hwehurumende hwekuti aite zvirongwa zvakanangana nekucherechedza zuva iri achiti izvi zvinokanganisa vana vari kunyora bvunzo.
Taungana Ndoro mutauriri webazi rezvedzidzo
Mutauriri webazi redzidzo VaTaungana Ndoro vati varairidzi nevadzidzi mangwana vanofanira kuita zvirongwa zvekucherechedza zuva rakatarwa neSADC rekukurudzira kubviswa kwezvirango zvakatemerwa vakuru vehurumende nenyika dzekumavirira.
Mamwe masangano evarairidzi akaita seAmalgamated Rural Teachers Union of Zimbabwe pamwe neProgressive Teachers Union of Zimbabwe anoti nhengo dzawo dzakaudzwawo mashoko aya nevakuru mubazi redzidzo mumatunhu akasiyana-siyana asi masangano aya ati haasi kuzoita izvi achiti zvinokanganisa kudzidza kwevana muzvikoro zvikuru sei avo vari kunyora bvunzo dzeOrdinary ne Advanced Level.
VaObert Masaraure -Artuz
Mutungamiri weARTUZ, VaObert Masaraure, vati zviri kurongwa nehurumende izvi zvinodzosera shure nyaya yedzidzo sezvo vana vakamborasikirwa nenguva yakawanda pakambovharwa zvikoro nekuda kwechirwere cheCovid 19.
Mutungamiri wenyika VaEmmerson Mnangagwa vakatarisirwawo kutura mashoko mangwana kuState House vachikurudzira kubviswa kwezvirango izvi ukuwo vaimbi vachizotarisirwawo kuita pungwe vachiimba kuChitungwiza Aquatic Complex vachihikurudzirawo kubviswa kwezvirango izvi pahurongwa huri kutungamirirwa nebazi rinoona nezvekuburitswa kwemashoko.
Vanotungamira nhengo dzeZanu PF muparamende, VaPupurai Togarepi, vati zvirango izvi zvinofanira kubviswa sezvo vachiti zviri kukonzera kuti veruzhinji munyika vanonge svosve nemuromo.
Asi imwe nyanzvi munyaya dzezvematongerwo enyika, VaRashweat Mukundu, vati hurumende inofanira kuita zvinobatika munyaya dzekucherechedza kodzero dzevanhu kuitira kuti zvirango izvi zvigobviswa kwete kuswera ichikuma yakakwira pamusoro pegomo isina zvairi kuita.
Nyika dzekumavirira dzakaita seAmerica dzakatemera Zimbabwe zvirango zvichitevera kusafambiswa zvakanaka kwesarudzo pamwe nekutyorwa kwekodzero dzevanhu munyika.
America inoti Zimbabwe inofanira kucherechedza kodzero dzevanhu uye kunanganisa mitemo nebumbiro remitemo yenyika kana ichida kuti zvirango zvibviswe. Inoramba kuti zvirango izvi zvakanangana nevanhuwo zvavo munyika asi vanotonga nedemo chete.
Zvirango izi zvakatemerwa muna 2001. America inoti nyaya yehuori nekutadza kutungamira ndiyo yapa kuti Zimbabwe iite sekunge yakageza negoka munyama kwete zvirango sezvinotaurwa nevatungamiri vehurumende.
Your browser doesn’t support HTML5
Nyaya Ina Frank Chikowore