Chizvarwa cheZimbabwe vari murimi wechidiki, VaTerrence Maphosa, vanoti vanofara chose nekukokwa kwavakaitwa kuti vanotaura kumusangano wesangano rinopa chikafu pasi rose reWorld Food Programme, (WFP), uri kuitwa muJohannesburg, South Africa neMugovera.
Musangano uyu wakanangana nekusimudzira vechidiki vari munyaya dzechikafu.
VaMaphosa ndivo muridzi wenzvimbo yekudyira nekutandarira ichangovhurwa kuMhondoro inonzi KwaTerry, uye murimi wechidiki ane mukurumbira anozivikanwa nekuchengeta huku dzechibhoyi pamwe nembudzi.
Sangano reWFP rinozivikanwa nekubatsira nechikafu pasi rose.
Sangano rinopa chikafu pasi rose, iri riri kuita musangano wevechidiki wezuva rimwe chete wakanangana nekugadzirisa zvimhingamipinyi munyaya dzekuwanikwa kwechikafu, uye kusimudzira vechidiki muzvirongwa zvinowanisa chikafu nekupedza matambudziko mudunhu rekuchamhembe kweAfrica.
VaMaphosa vaudza Studio 7 kuti kukokwa kwavo neWFP kunovapa kusimudzirwa kukuru kana vachitarisa kuti munhuwo zvake ari kukokwa achibva kumamisha kwavanogara.
Vanoti vanotarisira kuti vechidiki vakawanda vachadzidzawo kubva kumusangano uyu, uye vachagoverawo kune vamwe zvavachadzidza kumusangano uyu.
Your browser doesn’t support HTML5
Hurukuro naVaTerry Maphosa