Gurukota rinoona nezvehupfumi Muzvinafundo Mthuli Ncube vazivisa kuburikidza nemashoko kuvatori venhau kuti hurumende yamira kushanda nemamwe makambani gumi nematatu ari kupomerwa mhosva yekutenga nekutengesa mari pamusika wemukoto kana kuti black market zvavanoti zvinogona kukonzera kushaya simba kwedhora remunyika uye kudhura kwezvinhu.
Izvi zviri kuuya panguva iyo dhora remunyika riri kuramba richishaya simba zvakanyanya zvichienzaniswa nerekuAmerica.
Nhasi dhora rimwe chete rekuAmerica range richitengeswa nemadhora mazana matatu pamusika wemukoto.
Mamwe makambani arambidzwa kutengesera hurumende zvinhu anosanganisira Casha Designs Pvt Ltd, 7, Guide Marketing Pvt Ltd, Nomalanga Marketing Pvt Ltd, Gift Mwayera t/a Mwayera Transport Pvt Ltd, Mukot Haulage and Buses Pvt Ltd neOfixmore Marketing Pvt Ltd. Hatina kukwanisa kubata vakuru vemakambani ava kuti tinzwe divi ravo.