Chikwata cheCaps United icho chiri pamusoro pegungano reCastle Premier Soccer League chaita mangange nhasi nechikwata chine mukombe uyu cheFC Platinum. Mutambo uyu watambirwa kunhandare yeNational Sports Club.
Caps ndiyo yatanga kurova mambure nechibodzwa chanwiswa naWilliam Manondo muchikamu chekutanga. Asi FC Platinum yazodzora muchikamu chechipiri nechibodwa chanwiswa naRodwell Chinyengetere.
Caps iri kuramba iri pamusoro pegugano iri nemapoinzi gumi nerimwe chete (11) ichiteverwa neFC Platinum yacho in emapoinzi gumi (10). Kusvika parizvino, zvikwata zvose kunze kweDynamos neHighlanders zvatamba mitambo mishanu.
Dynamos neHighlanders dzatamba mitambo mina sezvo dziri kutambira mukombe wemhemberero dzekuwana kuzvitonga kuzere kana kuti Independence Cup musi wa 18 Kubvumbi. Zvikwata izvi zvaifanira kutamba kuBarbourfields nemusi weMugovera mumutambo weleague uyu.
Mimwe mitambo yatambwa nhasi:
Bulawayo Chiefs 2-2 Chicken Inn
Triangle 2-1 Black Rhinos