Mumiriri weZengeza West VaJob Sikhala avo vadarika mwedzi gumi vari mujeri reChikurubi vave kupomerwa imwe mhosva yechina yekuti vakakandira matambo vamwe vatsigiri vebato reZanu-PF vaina VaLovemore Maiko kuChitungwiza gore rapera. Mapurisa anoti pakati paVaSikhala naVaMaiko mumwe wavo akakonzera mhirizhonga musi wa 2 Chivabvu gore rapera nekukanda matambo kuvatsigiri veZanu-PF.
Asi pane vhidhiyo yakaburitswa panguva yaiitwa sarudzo dzemaby-elections iine vanofungidzirwa kuti vatsigiri veZanu-PF vachitema VaMaiko nematombo.
Hatina kukwanisa kubata mutauriri wemapurisa Assistant Commissioner Paul Nyathi kuti tinzwe divi ravo sezvo vati vange vachityaira motokari.
Gurukota rezvemitemo VaZiyambi Ziyambi vange vasiri kudaira nharembozha yavo asi vakamboramba kuti hurumende yave kupindira kuti VaSikhala varambe vari mujeri.
Asi rimwe geta raVaSikhala VaFreddy Masarirevhu vaudza Studio 7 kuti zvave kuitwa hazvinei nemutemo ai zvine chekuita nenyaya dzematongerwo enyika.
VaSikhala vari kupomerwawo dzimwe mhosva dzekuti vaida kukurudzira kuti vanhu vapandukire hurumende uye kokunzera kusagadzikana. Vari Kuramba mhosva dzose idzi.
Your browser doesn’t support HTML5
Hurukuro naVaFreddy Masarirevhu