Chikwata cheDynamos chatora humambo hwenhabvu hweHarare nekurova Caps United mumutambo mukuru weHarare Derby muNational Sports Stadium nhasi masikati.
Vatsigiri veDynamos vari murufaro mushure mekunge chikwata chavo charova Caps United 2-0 ndokuswedera pedyo nezvikwata zviri kutungamira makundano eCastle Lager Premier Soccer League. Dynamos yange yatamba matambo mitatu isina kukunda.
Mutsigiri weDembare Va Tedius Bhunu vanoti nyika yese iri kufara kuti chikwata chavanoti chenyika chakunda.
Dynamos yave nemapoinzi gumi nerimwe chete uyezve iri pachinzvimbo chechitanhatu asi mapoinzi matatu chete pasi peHighlanders iyo yave kutungamira makundano aya.
Mumwe mutsigiri wechikwata ichi, VaTinwell Tanyara avo vabva kuBulawayo kuzoona mutambo uyu vanoti havasi kudzokera kuBulawayo nhasi sezvo vari asi kupemberera sezvo mangwana vasiri kuenda kubasa.
Highlanders yatora hutungamiri hwegungano iri mushure mekurova Hwange 1-0 ndokupinda mumapoinzi gumi neina.
Kurohwa kwayaitwa neDynamos kwasiya Caps United iri pachinzvimbo chechitatu, ichiteverwa neFC Platinum iyo ine mutambo mangwana neHerentals muNational Sports Stadium.
FC Platinum ikakunda mumutambo uyu inoenda pamusoro petafura asi yozosiiwa neHighlanders nezvibodzwa.
Asi Caps United iyo yanga iri pamusha muHarare Derby irikunyemwerera yakananga kubhanga mushure mekunge mutambo uyu waunganidza chaunga chinotyisa.
Izvi zvauya mushure mekunge PSL yakaramba chikumbiro cheCaps yacho kuti mutambo uyu uite madhora mashanu ndokubvuma madhora matatu.
Nhengo yeZimbabwe National Soccer Supporters Association VaWonder Gombera vanoti chidzidzo kune vachada kukwidza kuti zvikwata zvinowana mari yakawanda pagedhe nekubhadharisa mari shoma nekuti inokwezva chaunga.
Asi maroverwo aitwa Makepekepe ashandura mafambiro anga achiita hondo yekurwira mukombe zvichiratidza kuti mukombe ungangoramba kudzoka kuHarare zvekare.
Asi chirikufadza ndechekuti zvikwata zvese zvine mukurumbira Caps, Dynamos neHighlanders, zviri kukwikwidza zvakasimba kutora mukombe weligi uyu.
Mukombe uyu uri mumaoko uyezve wanga uri mumaoko eFC Platinum kubvira muna 2017.
Mune mimwe matambo yatambwa nhasi,
Triangle 1- Chicken Inn 1, Sheasham 2, Cranborne 1.