Mutungamiri weWorld Boxing Federation, VaHoward Goldberg, vachange vari muZimbabwe musi wa 27 Chivabvu kumabiko ekupemberera kusiya tsiva kwemutambi wetsiva ane mukurumbira Charles Manyuchi.
VaGoldberg vanoti vakaona zvakakodzera kuti vave pamabiko aya vachitarisa zvakaitwa naManyuchi, uyo akasarudzwa semutambi weWBF akarura kudarika vese muna 2022 kana kuti WBF Boxer of the Year.
Vanoti vari kuronga kupa mutambi uyu ruremekedzo rwemumiririri wesangano iri muAfrica vaine chivimbo chekuti nekufamba kwenguva achapinda pavatungamiri vesangano rinotungamira tsiva iri.
Manyuchi ari kuregedza tsiva zvachose musi uyu sekutaura kwevanoronga mitambo yake, Muzvare Monica Cheru.
Muzvare Cheru vanoti musi uyu Manyuchi ari kurwa naSheriff Kasongo wekuDemocratic Republic of Congo, asi havasi kurwira bhande rake reWBF kwete. Vanoti vaviri ava vanenge vachiedzana masimba mumutambo wehushamwari.
Asi Manyuchi haasi kufara nemabatirwo aanoti ari kuitwa vatambi vemunyika munyaya dzemibairo kana vachinge vakunda vatambi vekune dzimwe nyika.
Mutambi uyu anoti zviri kuitika munyika munyaya dzemibairo yevatambi zvinomanikidza vamwe vavo kutengasa mitambo nekuti vanoona kuti zvavanowana mukutengesa mitambo zviri nani pane zvavari kuwana kunyika kwavo.
Kutengeswa kwemitambo idambudziko guru rapararira pasi rese nemhaka yekuwanda kwevanobhejesa mitambo munyika.
Mugore ra2012, vamwe vatambi vechikwata chenhabvu chema Warriors eZimbabwe vakambomiswa kutamba nhabvu mushure mekunge vawanikwa vaine mhosva yekutengesa mitambo apo Zimbabwe yaishanya kuAsia.
Manyuchi anoti Zimbabwe inofanira kugadzirisa zvakasimba nyaya dzekuchengeta vatambi vayo, kusadaro vanoguma vatora nzira dzisidzo kana kuti varasika.
Manyuchi ari kukurudzirawo vemabhizimusi nevanhuwo zvavo vanovimbisa vatambi mari nemibairo kana vachinge vakunda kuti vave vakavimbikawo kwete kunyangarika kana kuzotiza mutambi akunda mumutambo wake.
Muna 2019 pakaita mitauro yakawandisa apo Manyuchi akarohwa nekupunzirwa pasi zvisina tsarukano munharaunda yechitatu naQuadratillo Abuduqaxorov wekuUzebekistan.
Asi iye anoti haana kutengesa mutambo uyu, uyo uchiri kungotaurwa nezvawo.
Mukuru wekumahofisi eSports and Recreation Commission, Muzvare Elleta Nengomasha, vanoti vari kuita nepese pavanokwanisa kubatsira vatambi nezvikwata zvemunyika.
Vanoti vachangobva kubatsira zvikwata zvevechidiki zvemutambo we hockey izvo zvaive kumakundano eAfrica Cup kuEgypt.
Hurumende yakaburitsa zvekare mari yekuti Kuda Chiwandire adzivirire bhande rake reWBC resirivha naZulina Munoz wekuMexico.
Manyuchi ndiye mutambi wekutanga muZimbabwe kutora bhande reWBC achizoteverwa naChiwandire uyo ane resirivha riri reWBC zvekare. Manyuchi akatora bhande World Boxing Council welterweight muna 2014 mushure mekurova Patrick Allotey wekuGhana muraundi yechisere mumutambo waive nemaraundi gumi nemaviri.
Totarisa zvabuda mumitambo yenhabvu yeCastle Lager Premier Soccer League yatambwa munyika.
Yadah 0 Caps United 1, FC Platinum 2 Manica Diamonds 3, Chicken Inn 2 Herentals 1, Green Fuel 0 ZPC Kariba 0. Mitambo iriko neSvondo yakamira yakati Dynamos v Triangle; Sheasham v Highlanders; Hwange v Bulawayo Chiefs.
Mujaho wemabhiza weCastle Tankard waitwa neMugovera, bhiza rinonzi "Ideal View" ndiro ratora mukombe pamwe nemari inoita iyo zviuru makumi maviri nezvishanu zvemadhora ekuAmerica.
Dindingwe rapedza riri pachinhanho chechipiri richiteverwa naDown to Business.
Mabhiza mamwechetewo arikusangana muOK Grand Challenge musi wa 3 Chikumi.
Your browser doesn’t support HTML5
Nyaya ina Michael Kariati