Mutungamiri wenyika VaEmmerson Mnangagwa nhasi vange vachitarisirwa kuzivisa nezvezuva resarudzo sezvavakavimbisa kubinga nemusi weMugovera kuBinga.
Studio 7 yayedza kubata gurukota rezvemitemo VaZiyambi Ziyambi nemutauriri waVaMnangagwa, VaGeorge Charamba asi vose vange vasiri kudaira nharembozha dzavo.
Asi vamwe vane ruzivo nezviri kuitika vanoti sarudzo dzichaitwa musi wa 30 Nyamavhuvhu. Studio 7 yaudzwa kuti VaMnangagwa vachatara zuva zviri pamutemo kana dare reparamende ratambira kuvandudzwa kwemutemo wesarudzo.
Asi kunyangwe VaMnagagwa vari kutarisirwa chero nguva kutara zuva iri, vamwe vanopikisa vari kuti vakaita izvi vanenge vakurumidza kumedza kutsenga vachada sezvo gwaro revavhoti rakaita manyama amire nerongo vamwe vachishaya mazita avo, uye vanopikisa vachiti ZEC iri kuramba kuvapa gwaro iri sezvinotaurwa nemutemo.
Vanyora padandemutande retwitter vachiti havana kuona mazita avo vanosanganisira vakafanobata chigaro chemutevedzeri webato reCCC VaWelshman Ncube uye mubati wehomwe webato iri VaDavid Coltart.
Hatina kukwanisa kubata sachigaro weZEC Amai Priscilla Chigumba kana mukuru anoona nezvesarudzo mukomisheni iyi VaUtoile Silaigwana sezvo vanzi vange vari mumusangano. VaMnangagwa vari kuvimbisa havo kuti vachaita sarudzo dzakachena.
Your browser doesn’t support HTML5
Hurukuro naVaDouglas Mwonzora