Hurumende yeAmerica inoti ichaenderera mberi nekukurudzira vanhu vemuZimbabwe kuti vanyorese kuvhota uye kuti izwi ravo rinzwikwe. Izvi zvinotevera kudaidzwa kwemumwe mukuru kumuzinda wenyika yeAmerica kumahofisi ehurumende eMunhumutapa nezuro sezvo Zimbabwe iri kuti haisi kufara nezviri kunyorwa nemuzinda uyu padandemutande reTwitter.
America iri kukurudzira vanhu vemuZimbabwe kuti vanyorese kuvhota uye kuti vaite sarudzo murunyararo. Zimbabwe inoti uku kuda kupindira mune zvematongerwo enyika.
Asi mumashoko atumirwa Studio 7, mutauriri wemuzinda weAmerica muHarare, Muzvare Meg Riggs, vati America icharamba ichikurudzira runyararo munyika munguva yesarudzo, "America inoramba yakamira nezvainotenda mazviri munyaya yerunyaro, kuita zvinhu pachena uye kuyanana munguva yesarudzo." Vati ibasa remizinda yenyika kutaura nehurumende uye vanhu kuburikidza nemadandemutande nezvimwe.
Vaenderera mberi vachiti, "Tinomira nemashoko edu pamadandemutande ekukurudzira runyararo munguva yesarudzo...Vanhu vemuZimbawe vane kodzero yekusarudza mutungamiri wavo murunyararo, America haitsigiri munhu kana bato, tinotsigira kuitwa kwesarudzo dzakajeka uye murunyararo..izvi tinozviita munyika dzose dzepasi rino"
Muzvare Riggs vataura mashoko aya mushure memusangano pakati pemunyori mukuru mubazi rezvekudyidzana nedzimwe nyika Ambassador Rofina Chikava nemumwe mukuru kumuzinda weAmerica muHarare Muzvare Elaine French. Muzvare Riggs vati zvavari kutaura ndizvo zvinongotaurwa nguva dzose nemutungamiri wenyika VaEmmerson Mnangagwa kuti munyika muitwe sarudzo dzisina mhirizhonga.
Muzvare Riggs vati kodzero yekuvhota yakakosha kumunhu wese wemuZimbabwe uye America haina divi rainorerekera.
Zvichakadaro, Ambassador Chikava vanonzi vashora zvikuru nyaya iyi vachikurudzira America kuti isiyane netsika yekupindira munyaya dzezvematongerwo enyikamuZimbabwe.
Vati maitiro emuzinda weAmerica anotyora chibvumirano cheVienna Convention on Diplomatic Relations (1961)chinokurudzira nyika kuti dzisapindire mukutongwa kwedzimwe. Izvi zvatsinhirwa nemutauriri mubazi rezvekudyidzana nedzimwe nyika VaLevit Mugejo.
Nyanzvi munyaya dzekudyidzana nedzimwe nyika Dr Wellington Gadzikwa vatiwo zviri kuitwa neAmerica zvinokanganisa nyaya dzekudyidzana.
Vachitaurawo maonero avo, gweta rinorwira kodzero dzevanhu VaKennedy Masiye vati havaone havo patadza kutevedzerwa chibvumirano cheVienna neAmerica.
Izvi zvatsinhirwa nemutungamiri webato rinopikisa reDemocratic Party Doctor Wurayayi Zembe.
VaChikava vati America inofanira kumira kunyora mashoko ane chekuita nesarudzo kuitira kuumbiridza hukama pakati penyika mbiri idzi.