Zvikwata zvenhabvu yepamusoro yeCastle Lager Premier Soccer League zvichange zvisina zororo repakati pegore mwaka uno kana zvirongwa zviri mudariro zvikabudirira.
Vanoziva zviri kuitika vanoti zvikwata izvi hazvisi kuenda kuzororo repakati pegore semakore ose kubva musi wa 01 kusvika musi wa 31 Chikunguru kutsiva mazuva akamiswa mitambo nemhaka yekusashandiswa kwenhandare yeNational Sports Stadium.
Asi zvikwata izvi zvichapihwa mukana wekutenga nekutengesa vatambi panguva yazvinowanzoenda kuzororo iyi.
National Sports Stadium
Mutauriri wePremier Soccer League, Muzvare Kudzai Bare, vanoti pakaita zvitsva zvichabuda vachazivisa zvikwata neruzhinji rweZimbabwe zvikwata zvisati zvadzoka munhandare musi wa 01 Chikunguru.
Mitambo yakamiswa kwemasvondo matatu zvichitevera kumiswa kushandiswa kwenhandare yeNational Sports Stadium nemhaka yekushaya hutsanana.
Asi varairidzi vezvikwata zvemugungano iri havasi kufara nemamisirwo chiriporipotyo kwakaitwa mitambo vachiti marongero akadai anouraya mweya wekukwikwidza.
Murairidzi weManica Diamonds, Jairos Tapera, anoti haana kunyatsonzwisisa kuti zvinhu zvacho zvakafambiswa sei?
“Takangonzwa zvanzi mitambo yamiswa pasina kana ziviso yatakapihwa . Marongero akadai anonetsa kunzwisisa,” Tapera ataurira Studio 7.
Murairidzi weHerentals, Kumbirai Mutiwekuziva ,anoti zvinhu zvaomera vatambi nevarairidzi avo vanga vasingatarisire kuti mitambo ingangomiswa nenzira yakadai.
Murairidzi weHerentals, Kumbirai Mutiwekuziva
Murairidzi weSheasham, John Nyikadzino, anoti kumiswa kwemitambo panguva ino zvakafanana nekuti zvikwata zvatoenda kuzororo repakati pegore nguva yacho isati yasvika.
“Takanga tave kutamba zvakanaka tisisanwiswe zvibodzwa mitambo ndokungonzi yamiswa. Tave kuita kunge tatove pazororo iyo nguva yacho isati yasvika,” anodaro Nyikadzino.
Aimbove mubati wehomwe weZIFA Northern Region, VaWarren Kufandarerwa, vanoti mitambo yanga isingafanire kumiswa nemhaka yeNational Sports Stadium asi kuti zvikwata zvinoshandisa nhandare iyi zvaifanira kutsvaga dzimwe nhandare dzekushandisa sezvinongoitawo zvimwe zvikwata.
“MuHarare hamusisina nhandare inokodzera. Tave kuda kuonawo Caps United neDynamos dzichinoshandisa nhandare dzisiri muguta iri sezviri kuitawo zvimwe zvikwata. Zvikwata zvinofanira kupihwa mitemo yakafanana,” vanodaro VaKufandarerwa.
Murairidzi weDynamos, Hebert Maruwa.
Asi murairidzi weDynamos, Hebert Maruwa, anoti zvinenge zvarongwa nevakuru hazvipikiswe.
“Tinogamuchira zvinenge zvarongwa. Zvabva kuvakuru hazvipikiswe,” anodaro Maruwa.
Pari zvino makundano aya ari kutungamirwa neNgezi Platinum Stars, iyo ine mapoinzi makumi maviri nematatu, poindi imwechete pamusoro peHighlanders.
Your browser doesn’t support HTML5
Nyaya ina Michael Kariati