Vanhu mumadhorobha vari kuchema chema nekushaikwa kwoita zvinhu zvikuru zvekudya zvakaita semafuta ekubikisa, mukaka, shuga nezvimwe zvave kungotengeswa mumugwagwa kana kumatuckshop uko zvinenge zvichitengeswa nemadhora ekuAmerica chete.
Mutungamiri weConfederation of Zimbabwe Industries VaKurai Matsheza vaudza bepanhau reBusiness Times kuti kushomeka kwezvinhu muzvitoro harisi dambudziko ravo sezvo vari kutengesera wose anoda zvinhu vangava vemabhizimisi makuru kana madiki.
Asi vemabhizimisi makuru vanoti vari kurasikirwa nemari zhinji nekutenga zvinhu nemadhora ekuamerica vomanikidzwa neRBZ kutengesa nemadhora emunyika.
Mutungamiri wenyika VaEmmerson Mnangagwa avo vasimuka nhasi vakananga kuGhana kumusangano we African Export-Import Bank vari kupomera vemabhizimisi nevekunze mhosva yekuda kukanganisa hupfumi pamberi pesarudzo. Asi vanopikisa nevekunze ava vanoti huori nekutonga nedemo ndizvo zvauraya nyika.
Nyanzvi munyaya dzezvehupfumi VaVictor Bhoroma vati kushaya simba kwedhora remunyika ndiko kuri kupa kuti zvinhu zvidhure nekushaikwa muzvitoro.
Your browser doesn’t support HTML5
Hurukuro naVaVictor Bhoroma