Chikwata chemutambo we kiriketi chenyika, cheZimbabwe Chevrons, chapinda zvine mutsindo munharaunda yakakosha yeSuper Six Stage mushure mekurova West Indies nemaranzi makumi matatu nemashanu muHarare Sports Club.
Vatsigiri vemutambo uyu vazadza nhandare yeHarare Sports Club, vatadza kupinda ndokurongerwa kunzi vaone mutambo uyu pachivhitivhiti munhandare yemutambo we rugby iyo iri pedyo.
Kunyange hazvo Sikandar Raza asimudza chaunga ichi nekukanda maranzi makumi matanhatu nemasere (68) achibatsirwa naRyan Burl, uyo akanda makumi mashanu (50), kubuditsa munhandare kwavaita vatambi vapfumbamwe veWest Indies ndizvo zvashamisa pasi rese.
Chiri kufadza zvekare ndechekuti mapoinzi maviri avatora varova West Indies anoverengwa muSuper Six Stage umo vari kuenda.
Zimbabwe yave kubatana neWest Indies neNetherlands kubva muGroup A kuenda muSuper Six, umo muchange zvekare muine Sri Lanka, Scotland neOman.
Zvikwata zviviri zvichapedza zviri pamusoro muSuper Six ndizvo zvinobudirira kuenda kumafainari e2023 World Cup ayo achaitirwa kuIndia.