Mutauri webato reZanu-PF VaChris Mutsvangwa vanoti vaimbova gurukota rehurumende VaSavior Kasukuwere vakangopinda munyika vachasungwa. VaKasukuwere vakanyoresa kuti vakwikwidze musarudzo dzemutungamiri wenyika musi wa23 Nyamavhuvhu.
Vakaudza vatori venhau kuti havasi kutya kukandwa mujeri vakadzoka kubva kuSouth Africa kwavari.
Vakativo vachataura nevatungamiri venyika dzemuSADC kuti vabvumidzwe kukwikwidza musarudzo dzemutungamiri wenyika.
VaChris Mutsvangwa naVaTafadzwa Mugwadi
Asi VaMutsvangwa vati VaKasukuwere vane mhosva dzavari kutsvagirwa dzavasina havo kudoma. Hatina kukwanisa kubata gurukota rezvemukati menyika VaKazembe Kazembe kuti tinzwe divi ravo sezvo nharembozha yavo yange isiri kudavirwa.
Dzimwe nyanzvi munyaya dzezvematongerwo enyika dzinoti Zanu-PF iri kutya kuti VaKasukuwere vakabvumidzwa kutsvaga rutsigiro vanogona kutora mavhoti akawanda kunaVaMnangagwa zvopa mutungamiri weCCC VaNelson Chamisa mukana wekukunda musarudzo dzemutungamiri wenyika.
Your browser doesn’t support HTML5
Hurukuro naVaChris Mutsvangwa