Nhandare yeQueens Sports Club mangwana irikutarisirwa kuzara kuti tashu apo maChevromd arikupinda munhandare mumutambo wavo wakaomesesa weICC World Cup Qualifier.
Chikwata cheZimbabwe ichi chiri kuda rutsigiro rwakakura apo chiri kusangana neSri Lanka, iyo ine mapoinzi matanhatu uyezve iri pamusoro petafura yeSuper Six Stage.
Kunyange hazvo zvikwata zviviri izvi zvakaenzana pamapoinzi matanhatu, Sri Lanka, ndiyo iri pamusoro petafura yeSuper Six nekukanda maranzi akawandisa.
Asi mangwana chimwe chezvikwata zviviri izvi chiri kuwana tikiti rekuenda kuWorld Cup kuIndia kana chikakunda nekupinda mumapoinzi masere.
Muongorori wezvemitambo, VaAdmire Muhimeke, vanoti pasvika Zimbabwe apa hapasisina kudzokera shure.
“Chokwadi ndechekuti pasvika Zimbabwe apa hapasisina kudzokera shure. Sri Lanka ingangove iine mukurumbira asi inorohwa chete,” anodaro Muhimeke.
Pari zvino Zimbabwe yakunda mumitambo yayo yese mishanu yayatamba ichitungamirwa nevatambi Sikandar Raza, Sean Williams, Ryan Burl, Wesley Mandevere, Craig Ervine naBlessing Muzarabani.
Leornard Nhamburo
Murairidzi wemutambo wekiriketi, Leonard Nhamburo, anoti kubvira pakaenda Zimbabwe kumafainari eT20 World Cup gore rapera, vatambi vayo vanga vachiratidza nzara inotyisa yekuda kukunda.
“Kubvira Zimbabwe yaenda kuT20 World Cup nemurairidzi mutsva Dave Houghton matambiro avo asanduka. Vakawirirana zvavanoda zvekuti vatambi ava vane nzara yakakura yekuda kukunda,”
Asi muteveri wechikwata ichi, VaEdmore Muthetwa vanoti mutambo neSri Lanka wakaoma zvikuru zvekuti Zimbabwe inoda rutsigiro rwakasimba.
“Kwavasvika kwakaoma, vave kuda rutsigiro rwedu rwakasimba. Handei tinotsigira vakomana,” vaMuthetwa vanoisa chikumbiro kuruzhinji rweZimbabwe.
Mutambo wamangwana wanyanya kuoma nekuti chikwata chavari kuzotamba nacho vabva paSri Lanka, Scotland nhasi masikati charova West Indies nemawiketsi manomwe ndokupinda mumapoinzi mana.
Zvikwata zviviri zvichapedza zviri pamusoro petafura yezvikwata zvitanhatu yeSuper Six ndizvo zvinobudirira kuenda ku2023 World Cup kuIndia.
Zvichakadaro, Chikwata chenhabvu cheNgezi Platinum Stars chasimbisa hutungamiri hwacho hweCastle Lager Premier Soccer League mushure mekurova Hwange 2-1 muBaobab Stadium.
Ngezi Platinum Stars
Ngezi yapinda mumapoinzi makumi maviri nematanhatu,mapoinzi maviri pamusoro peFC Platinum, iyo yarovawo Chicken Inn 2-0 muMandava.
Mimwe mitambo yanhasi yapera seizvi ….Manica Diamonds 1 Sheasham 0, Bulawayo Chiefs 0 Greenfuel 2, ZPC Kariba 2 Yadah 1.
Asi mutambo mukuru svondo rino uriko neSvondo muBarbourfields Stadium umo Highlanders iri kusangana neCaps United.
Mimwe mitambo iriko neSvondo inoti Black Rhinos vs Dynamos - Bata, Herentals vs Simba -Mandava neTriangle vs Cranbourne - Gibbo.
Mumutambo wetenesi, mutambi wemuZimbabwe, Benjamin Lock, ari kupinda munhandare manheru ano mufainari yeMedellin Challenge kuColombia umo ari kusangana naPatrick Krypson wekuUSA.
Aka ndiko kekutanga vatambi ava vachisangana asi pari kuratidza kuti hapana musiyano wakanyanya mumatambiro avo.
Asi ruzhinji rwemuZimbabwe rwuri kutarisira kuti Lock anokunda mumutambo uyu.
Your browser doesn’t support HTML5
Nyaya ina Michael Kariati