Chimwe chizvarwa che Zimbabwe, chinoshanda nesangano reStand Foundation Trust Zimbabwe, Muzvare Charlene Chekenya, vakasimudza mureza weZimbabwe nemusi weChina apo vakapihwa chiremerera chekuparura chirongwa cheInternational Human Rights Youth Summit kumuzinda weUnited Nations uri muNew York.
Muzvare Chekenya vakapa mashoko ekuvhura musangano uyu pamwechete nemutungamiri weTimor Leste, Va Jose Ramos-Horta avo vakambopihwa mubairo weNobel Peace Prize.
Misangano iyi iri kuitwa pasi pedingindira rinoti , “IMAGINE: Equality Dignity Unity. Youth making it a reality”, uye inopera musi weMugovera pachaitwa mabiko ekupemberera tsika nekodzero dzevanhu dzemarudzi nemapoka akasiyanasiyana, kana kuti multicultural human rights celebrations mumusha weHarlem kwakare kuNew York.
Muzvare Chekenya vanoti donzvo ravo guru rekuuya kumisangano iyi ndere kuzodzidza nekugoverana miono nemazano nevamwewo vari kushanda mune zvekurwirwa kwekodzero dzevanhu pasi rese kuti vagone kunokwenenzvera basa ravo kana vachinge vadzokera kumusha.
Your browser doesn’t support HTML5
Hurukuro na Muzvare Charlene Chekenya