Mutongi wedare reHigh Court, Justice Munamato Mutevedzi, vatongera rufu Tafadzwa Shamba naTapiwa Makore Snr mushure mekuvabata nemhosva yekuponda Tapiwa Makore Jnr muna 2020.
VaMutevedzi vati dhimoni rakabata vaviri ava pavakauraya Tapiwa harina inmwe nzira yekuripedza kunze kwerufu uye vati ropa ravo rinofanira kuripa ropa raTapiwa Makore Jnr.
Amai vemufi, Amai Linda Munyori vaudza Studio 7 kuti kunyange hazvo vafara nemutongo wapihwa nedare vachazorora chete kana vawana musoro wemwana wavo.
Tapiwa Jnr akavigwa asina musoro uchifungidzirwa kuti wakashandiswa kuromba.
Baba VaTapiwa, VaMunyaradzi Makore, vatambira mutongo wedare vachiti unoenderana nemhosva yakaparwa asi vakati vanosuwa nekudi dare harina kugadzirisa nyaya yekuti musoro uri kupi.
Rimwe remagweta evasungwa, VaMunya Rex Midzi, vati vange vakamirira kunzwa kubva kuvaviri ava kuti vachapikisa mutongo wedare here kana kuti kwete.
Zimbabwe yakapedzesera kuuraya vanhu muna2005. Vachpindura mubvunzo weStudio 7 wekuti sei vanhu vachiri kutongerwa rufu umo munyika musiri kuurayiwa mhondi dzacho, gurukota rezvemitemo VaZiyambi Ziyambi vanoti kunyangwe mutemo uri kuda kuvandudzwa, uchiri mutemo uri kushanda.
Kusanganisira Shamba naMakore Snr, Zimbabwe kubva pakapedzisira kuurayiwa vanhu muna 2005 yave nevanhu makumi manomwe vakatongerwa rufu.
Your browser doesn’t support HTML5
Nyaya Ina Godwin Mangudya