Mutevedzeri wasachigaro veZimbabwe Electoral Commission, ZEC, uye vari mutauriri wekomisheni iyi, VaRodney Kiwa, vanoti komisheni yavo iri kushanda nemapurisa ari kuferefeta nyaya yekudonha kunonzi kwaita mapepa ekuvhotesa, ballot papers, kubva mune imwe motokari muHarare.
Izvi zvinotevera mashoko ekuti motokari yakatakura mapepa aya ichienda nawo Bikita West yaadonhedza mumugwagwa weHarare-Masvingo pedyo nemusha weSouthlea Park.
Mukuru wesangano rinoongorora sarudzo, reElection Resource Centre, iro rinonzi ndiro rine vashandi vaona zvichiitika, Muzvare Barbara Bhebhe, vanoti mapepa aya aendeswa kumapurisa epa Southlea.
Muzvare Bhebhe vanoti havana ruzivo rwekuti mapepa mangani adonhedzwa nemotokari iyi, uye kuti hapana here veruzhinji vangadai vaanhongawo vangazoashandisa zvisizvo.
Vatiwo chiitiko chimwechete ichi havaoni chichisvibisa zita reZEC pahurongwa hwayo hwekufambisa sarudzo.
Your browser doesn’t support HTML5
Hurukuro naMuzvare Barbara Bhebhe