Zvimwe Zvizvarwa zveZimbabwe zvinogara kunze kwenyika zvine chitsama zvakakwanisa kudzokera kumusha kunovhota zvinoti zvafadzwa nekubudirira kwazvaita.
Vanotsigira mapato anopikisa vanoti vanofara chose kuti vaisawo ruoko rwavo muhurongwa hweshanduko iri kutarisirwa munyika.
Vanotsigirawo bato riri kutonga reZanu PF, vanotiwo vane mufaro mukuru kuti vabatsira kusimbisa midzi yehutongo hwebato ravo.
Mumwe wevakwanisa kuvhota vachibva kuSouth Africa ndaVaDennis Juru, vanove mutungamiri wesangano reInternational Cross Border Traders Association, uye vachitsigira bato guru rinopikisa reCitizens’ Coalition for Change.
Vashandi veZEC vachigadzirira
VaJuru, avo vavhotera paRuwa Local Board Workshop Polling Station B, vanoti vakakwanisa kuenda kunovhota nehuwandu hwavo vachibva kuSouth Africa kuti vavhotere shanduko.
Asi Vanoti havana kufadzwa nekushaikwa kwemapepa ekuvhotesa mune dzimwe nzvimbo dzanga dzichivhoterwa nenhengo dzesangano ravo dzavakabva nadzo kuSouth Africa.
Mumwe akwanisa kuvhota ndaVaRegis Charumbira Vusango, vanove sachigaro veZanu PF kuCanada, avo vavhotera paMudavanhu Polling Centre kuMasvingo West.
VaCharumbira vanoti zvinhu zvanga zvakarongeka mudunhu mavo vachiti ivo zvavatorera maminitsi maviri chete kuti vange vapedza kuvhota, vachiti kwanga kusina kana mitetse.
Muteereri weStudio 7 mukuru, Mufundisi Richard Moyo, avo vanogara nekushandira kuSouth Africa, ndemumwe wevana veZimbabwe vakadzokera kumusha kunovhota.
Mufundisi Moyo vanoti vavhotera paSangwe Primary school pasi paMambo Gudo kuChiredzi.
Mapepa ekuvhotesa anonzi anonoka mune dzimwe nzvimbo.
Vamwe vana veZimbabwe vanogara muBotswana vanga vachiri munzira kuenda kuZimbabwe kunovhota patataura navo masikati, vachinge vavimbisa kuzotizivisa kana vasvika asi vanga vasati vatibata pataenda pamhepo.
Mapato anoti Zanu PF, CCC neEFF yekuSouth Africa pamwe nevaida kukwikwidza vakazvimirira musarudzo dzemutungamiri wenyika, VaSavior Kasukuwere, vakanga vakavimbisa kuti vachabatsira vana veZimbabwe vari munyika dzakapoteredza nechekufambisa kuti vakwanise kudzokera kumusha kunovhota.
Studio 7 haina kukwanisa kunzwa kuti izvi zvazobudirira here.
Zvichabuda musarudzo zvinotarisirwa kuziviswa zviri pamutemo neZEC mukati memazuva mashanu.
Your browser doesn’t support HTML5
Nyaya ina Jonga Kandemiiri