Nzira dzese dzichange dzakananga kuBarbourfields Stadium mangwana kumutambo mukuru weCastle Lager Premier Soccer League pakati pezvikwata zvenhabvu zvine mukurumbira munyika, Dynamos neHighlanders, uyo uri kudaidzwa nevamwe kuti “Battle for Zimbabwe Part 2”
Vamwe vatsigiri vezvikwata zviviri izvi vatove muguta reBulawayo kubva munzvimbo dzakasiyana-siyana vakamirira mutambo mukuru uyu.
Mutsigiri weDynamos FC, VaTinwell Tanyara.
Mutsigiri weDynamos, VaTinwell Tanyara vanoti vatononokerwa nekuti mitambo yakadai inovanakidza zvikuru.
"Ndiwo ma game anotinakidza iwaya especially Dynamos neCaps United, kana Highlanders ne Dynamos. Ndiwo atinenge takatarira kuti chatsva chatsva," vanodaro VaTanyara.
Mutambo uyu wauya panguva iyo zvikwata zviviri izvi zviri kubaka moto, kunyange hazvo Highlanders yakambotatarika pamitambo yayo maviri yadarika, zvekuti vatsigiri vemutambo uyu vanofanira kutarisira nhabvu yemhando yepamusoro.
Highlanders iri muhasha mushure mekubviswa pamusoro petafura nhasi neNgezi iyo yarova Manica Diamonds 1-0 muBaobab Stadium.
Murairidzi weHighlanders DC, Baltemar Brito
Ngezi yapinda mumapoinzi makumi mana nemaviri, poindi imwechete pamusoro peBosso iyo ine mapoinzi makumi mana nerimwechete.
Asi Dembare haisi kuita zvekutamba kubvira musi uyo Genesis Mangombe akatambidzwa basa rehurairidzi achitsiva Hebert Maruwa.
Dynamos yacho yakangosiiwa neNgezi nemapoinzi matanhatu kwasara mitambo gumi nemitatu kuti makundano aya apere.
Mutsigiri wemutambo wenhabvu, VaJohannes Mutisi, vanoti mutambo uyu wakaoma zvikuru zvekuti unonetsa kudoma kuti anokunda ndiani
"Dynamos neHighlanders dziri kutamba zvakanaka panguva ino. Zvinonetsa kuti uti anokunda ndiani nekuti vese varikuda kukunda," vadaro VaMutisi.
Highlanders ichitamba neNgezi Platinum.
Asi mutsigiri weHighlanders, VaSimbai Mahachi, vanoti vari kudarika paDembare apa nekudzokera pamusoro petafura.
"Chikwata chedu chiripo ichi chakarongwa nemurairidzi wedu watinaye uyu chihombe. Chatirangaridza mazuva anaTitus Majola ana Dumisani Ngulube. Chasara chete kutora mukombe uyu," varikushuwira VaMahachi.
Mitambo neMugovera yanga yakati fararira kumativi mana ese enyika, kusanganisira uyo watambwa muMandava Stadium umo Caps United yarohwa 2-1 neFC Platinum.
Asi FC Platinum, iyo ine mukombe uyu, iri kure zvikuru nekusvika pakurwira mukombe sezvo iri pasi peNgezi nemapoinzi manomwe.
Mimwe mitambo yyapera seizvi, Chicken Inn FC 1 Byo Chiefs FC 1; Black Rhinos FC 1 Triangle FC 1; ZPC Kariba FC 1 Herentals College FC 0; Greenfuel FC 1 Sheasham FC 0.
Mimwe mitambo iriko neSvondo yakamira yakadai,
Hwange FC VS Simba Bhora FC; Yadah FC vs Cranbourne Bullets FC.
Your browser doesn’t support HTML5
Nyaya ina Michael Kariati