Mapurisa muHarare anonzi asunga vachangobva kugadzwa semutevedzeri wameya weguta reHarare, vari vebato reCitizens' Colaition for Change, Muzvare Kudzai Kadzombe, vachipomerwa mhosva yekurova imwe nhengo yeZanu PF yavaikwikwidzana nayo munguva dzesarudzo dzakaitwa mwedzi wapera.
Muzvare Kadzombe vanonzi vatorwa nemapurisa epakamba yeMarlborough.
Gweta riri kumirira Muzvare Kadzombe, VaJeremiah Bamu, vesangano remagweta anorwira kodzero dzevanhu reZimbabwe Lawyers for Human Rights, vatenda kuStudio 7 kuti Muzvare Kadzombe vasungwa uye vati vanotarisirwa kumiswa pamberi pedare neChishanu mangwanani.
Studio 7 haina kuwanisa kunzwa divi remapurisa panyaya iyi sezvo tatadza kubata mutauriri wemapurisa Assistant Commissioner Paul Nyathi.
Bato reCitizens' Coalition for Change rinoti kusungwa kwaMuzvare Kadzombe pamwe nedzimwe nhengo dzebato iri kwakanangana nekuda nekushurudza nhengo dzaro.
Your browser doesn’t support HTML5
Hurukuro naVaJeremiah Bamu