Hurumende yeAmerica yakatarisana nekumanikidzwa kumbovhara mamwe mapazi pamwe nekumisa vamwe vashandi mabasa mukupera kwesvondo rino kana makakatanwa ari mudare reparamende pakati penhengo dzeRepublican Party neDemocratic Party pamusoro pemari inofanirwa kushandiswa nehurumende akasakasika kugadziriswa.
Nhengo dzebato rinokisa reRepublican Party mudare reHouse of Representatives dzinonzi dziri kuomesa musoro dzichiramba kutambira hurongwa hwemari hwaiswa patafura nebato riri kutonga reDemocratic Party.
Nhengo dzakaoma musoro izi dzinonzi dzarambawo zvakare kutambira hurongwa hwemari yekuti hurumende imboshandisa kwemazuva makumi matatu pachitauriranwa hwanga hwaiswa zvakare patafura nemutungamiri wadzo mudare iri, zvichireva kuti mamwe mapazi ehurumende anogona kutanga kuvhara neSvondo.
Bhajeti regore rino riri kupera Mugovera 30 Gunyana, zvichireva kuti kubva musi we Svondo 01 Gumiguru hurumende inofanirwa kunge yave kushandisa bhajeti idzva kana kuvhara mamwe mapazi nekumisa vamwe vashandi mabasa.
Nyanzvi mune zvehupfumi nekudyidzana kwenyika dzapasi rose, Muzvinafundo Elliot Masocha, vanodzidzisa zvehupfumi paDevry University kuOhio muAmerica vanoti kana mapoka maviri aya akasawirirana kanenge kasiri kekutanga kuti mamwe mapazi ehurumende avharwe.
Muzvinafundo Masocha vanoti kana izvi zvakaitika chinenge chiri chinhu chisingape chimiro chakanaka kunyika neAmerica, iyo inotariswa nepasi rose kuti inotungamira munyaya dzehupfumi.
Vanoti zvinokanganisawo mukuti America inenge isisakwanise kubhadhara zvikwereti zvayo kunyika dzainenge yakakweretawo, uye zvinokanganisa musika wemari we stock market.