Mumwe ave kuzviti ndiye munyori mukuru webato reZanu-PF VaTafadzwa Manyika vanoti vanyora tsamba kumutauriri wedare reparamende vachiti vadzinga nhengo dzebato iri makumi manomwe mudare reparamende vachiti vakasarudzwa zvine huori mukati nemutungamiri webato iri VaEmmerson Mnangagwa nemudzimai wavo.
Vari kunzi vadzingwa vanosanganisira makurukota Amai Barbra Rwodzi, VaJuly Moyo, VaWinston Chitando nevamwe.
VaManyika vaudza Studio 7 kuti vapa mutauriri wedare reparamende VaJacob Mudenda tsamba iyi. Hatina kukwanisa kubata VaMudenda kuti tinzwe divi ravo kana mabharani mukuru wedare iri VaKennedy Chokuda.
Asi vanokokera bato reZanu-PF mudare reparamende VaPupurai Togarepi vaudza Studio 7 kuti Havana kuona tsamba iyi pavaenda kuparamende uye vange vasina kusumwa nezvayo.
Your browser doesn’t support HTML5
Hurukuro naVaPupurai Togarepi
Asi mutauriri webato rinopikisa reCitizens Coalition for Change VaPromise Mkwananzi vakurudzira VaMudenda kuti vadzingewo nhengo dzeZanu-PF sezvavakaita dzeCCC.
Your browser doesn’t support HTML5
Hurukuro naVaPromise Mkwananzi
Nyanzvi munyaya dzezvematongerwo enyika vari mukuru weZimbabwe Democracy Institute, Doctor Pedzisayi Ruhanya vati VaMudenda vakakanganisa pavakadzinga nhengo dzeCCC zvopa kuti dare reparamende rishaye chiremera.
Your browser doesn’t support HTML5
Hurukuro naDoctor Pedzisayi Ruhanya