Hondo yeIsrael nechikwata cheHamas iri kuenderera mberi panguva iyo mutungamiri weAmerica VaJoe Biden vasvika muIsral nhasi umo vaita hurukuro nemutungamiri wehurumende yenyika iyi VaBenjamin Netanyahu muguta reTel Aviv.
Misangano iyi iri kuitika paine kuratidzira kukuru kuri kuitika mudunhu reMiddle East mushure mekuurayiwa kwakaitwa vanhu pachipatara chiri muGaza. Hamas inoti Israel ndiyo yakabhomba, asi iri kuramba nyaya iyi.
Vachitaura vari muIsrael, VaBiden vavimbisa kumira nenyika iyi muhondo iri kutyirwa kuti inogona kupararira kune dzimwe nyika dziri muMiddle East. Asi VaBiden vati donzvo ravo nderekuti pasadeuka ropa revasina mhaka.
Vachitaurawo pamusangano uyu VaNetanyahu vaudza vaBiden kuti chikwata cheHamas ndicho chirikukonzera kufa kwevanhu vazhinji.
Asi veHamas vanoti Israel ndiyo iri kukonzera kusagadzikana muMiddle East. KunyuNyuta nezviri kuitwa neIsrael kwakapa kuti mutungamiri wenyika yePalestine VaMahmood Abbas namambo vekuJordan Abdullah II Bin Al-Hussein varambe kuita misangano naVaBiden mushure mekunge Israel yapomerwa mhosva yekubhomba chipatara muGaza ndokuuraya vanhu vanodarika mazana mashanu. Israel iri kuramba kuti ndiyo yakazviita.
Chimwe chizvarwa cheZimbabwe chinogara kuMalta chinoshanda nesangano re Cross Cultural International Foundation rinobatsira vanenge vakatarisana nehondo VaDouglas Bvumburah vanoti vari kushanda nemamwe masangano ari mumatunhu maviri aya vachibatsira varikutarisana nehondo. Vanoti sangano ravo harina kwarakarerekera.
"Basa redu rinosanganisira kubatsira vanenge vatarisana nehondo uye parizvino tiri kushanda nemamwe masangano ari muIsrael nePalestine mukupa rutsigiro rwunosanganisira kutaura neavo vanenge vatarisana nekufirwa nezvimwe sezvo tichishanda tisina kwataka rerekera," VaGumburah vaudza Studio7.
Nyanzvi munyaya dzezvematongerwo enyika uyezve vachishanda nechikoro chepamusoro cheTswane University of Technology kuNavaite nhaurirano.
"Tiri kuwona vanhu vazhinji varikushaika munyika mbiri idzi kunyangwe zvazvo varikukurudzirwa kuti hondo iri pakati peIsrael neHamas imire. Zvakakosha kuti vatungamiri veHamas nenyika yeIsrael vataurirane hondo iyi isati yapararira kune dzimwe nzvimbo mudunhu iri," VaMukonza vaudza Studio7.
Vanhu vakawanda vari kuratidzira muMiddle East nedzimwe nyika vachitsutsumwa nekubhombwa kwechipatara chemuGaza.
Your browser doesn’t support HTML5
Nyaya ina Marvellous Mhlanga-Nyahuye