Zvikwata zviri kurwira mukombe weCastle Lager Premier Soccer League zviri kupinda munhandare mangwana asi nhasi munhandare manga muine zvimwe zvezvikwata zviri kurwira hupenyu hazvo mumakundano aya.
Ngezi Platinum Stars, iyo iri kutungamira makundano aya pamwe neHighlanders neDynamos, idzo dzakaisona, dzine mitambo mangwana asi FC Platinum, iyo ine mukombe uyu, yatamba nhasi.
FC Platinum yaita mangange 1-1 neGreenfuel ndokutora poindi imwechete yakakosha panguva iyo makundano aya ave kusvika kwamvura yacheka makumbo.
Mangange aya apinza Kugona Kunenge Kudada mumapoinzi makumi mana nemanomwe, mapoinzi manomwe pasi peNgezi iyo iri pamusoro petafura.
Asi Platinum yasvetuka Dynamos iyo ine mapoinzi makumi mana nematanhatu, asi yaenzana neHighlanders, iyo iri pachinhanho chechipiri.
Issa Phiri weDynamos FC
Highlanders neDynamos dzine mitambo yakaoma mangwana apo Bosso iine vavakidzani vayo veBulawayo Chiefs, panguva iyo Dembare iri munzira kuenda kuNyamhunga Stadium kunosangana neZPC Kariba.
Murairidzi weDynamos, Genesis Mangombe, anoti vari kuda kukunda mumutambo wese wavari kusangana nawo kuti vadimbure mapoinzi avakasiiwa nawo neNgezi.
“Mitambo ichiripo. Isu zvatichangoita ndezvekuti mutambo wese tinofanira kukunda. Zvikadaro tinenge tichidzikisa mapoinzi atakasiiswa nawo,” anodaro Mangombe.
Mangombe ari kutarisira kuti Keith Madera, Issa Sadiki, Donald Mudadi, naTanaka Shandirwa vachasimudza matambiro avo semazuva ese.
Ngezi yacho kana kuti Madamburo iri pamusha muBaobab Stadium neYadah FC mumutambo wavanofanira kukunda kunyange zvikaoma sei.
Asi Yadah inowanzomira mira pamitambo nezvikwata zvakaita seNgezi zvekuti murairidzi wayo, Expense Chitukutu, anoti vatsigiri vavo ngavauye kuzovabatsira.
“Vatsigiri vedu tinovaudza kuti ngavauye nehuwandu hwavo. Vatsigiri vatambi ava. Tinokwanisa kukunda,” adaro Chitukutu.
Herentals College FC yaswederawo pedyo nezvikwata zviri kurwira mukombe nekurova Sheasham 1-0 muNational Sports Stadium.
Murairidzi weCaps United Lloyd Chitembwe
MaStudents ave pachinzvimbo chechishanu nemapoinzi makumi mana nemashanu, poindi imwechete pasi peDynamos.
Manica Diamonds, iyo yakambotungamira makundano aya, ine Hwange iyo iri kurwirawo nzvimbo yayo muPremiership.
Asi munyori mukuru wemaGems VaSugar Chagonda vanoti havasi kutarisira Hwange pasi nekuti hakusisina zvikwata zvinonzi zviduku munhabvu.
“Hakuna chikwata chatingati chidiki. Asi mukatarisa matambiro ari kuita vakomana vedu iko zvino izvi, hatifanire kuita matambudziko,” vanodaro VaChagonda.
Hwange, iyo iri pachinzvimbo chechisere, yakasonana neCaps United iyo iri muNational Sports Stadium ne Cranbourne Bullets mangwana.
Black Rhinos yaramba iri pachinzvimbo chechipiri kubva pasi mushure mekuita 1-1 neChicken Inn, zvimwechetezvo zvabuda pamutambo weTriangle neSimba Bhora.
VePremier Soccer League havasati vazivisa kuti kune mitambo yeligi here svondo rinouya sezvo zvimwe zvikwata zvichange zviri mumitambo yemasemi fainari eChibuku Super Cup.
Your browser doesn’t support HTML5
Nyaya ina Michael Kariati