Sangano revapepeti vakuru venhau reNational Editors Forum rinoti riri kuronga kuenda kumatare uye kutaura negurukota rezvekuburitswa kwemashoko VaJenfan Muswere nezvakaitwa nevasori nevatsigiri vebato reZanu-PF nezuro zveku manikidza vamwe vatori venhau kudzima mifananidzo yavainge vatora panonzi pakafenda mumwe mutevedzeri wemutungamiri wenyika VaKembo Mohadi.
Vanokokera mabasa musangano reNational Editor Forum VaNjabulo Ncube vanoti vachaenda kumatare vachinyunyuta nezvakaitwa nevasori nevebato reZanu-PF.
Your browser doesn’t support HTML5
Hurukuro naVaNjabulo Ncube
VaMohadi vanonzi vakadonha vachitsvaga rutsigiro kuGutu West uko kuri kukwikwidzwa naVaJohn Paradza vanova mutevedzeri webazi revechidiki muZanu-PF youth League.
Musarudzo iyi mune vana vari kukwikwidza kusanganisira Va Ephraim Morudu veCCC, VaRobson Kurwa veNCA, naVaMartin Mudzingwa vakazvimiririra. Vanhu vari kutarisirwa kuvhota musi wa 11 Mbudzi.
Sarudzo idzi hadzina kuitwa nedzimwe musi wa 23 Nyamavhuvhu mushure mekunge mumwe aikwikwidza VaChristopher Mutonhori Rwodzi vashaya munjodzi yemumugwagwa.
VaMohadi vanonzi vakatotakurwa nechikopokopo mushure mekudonha. Hatina kukwanisa kubata VaMuswere kuti tinzwe divi ravo panyaya iyi.
Asi kunyika dzalkawanda kusanganisisa muAmerica, mifananidzo yemutungamiri wenyika VaJoe Biden vachidonha mushure mekutadza kutsika inogara ichiburitswa.