Mutungamiri wenyika, VaEmmerson Mnangagwa, vadoma mukuru wemauto eZimbabwe Defence Forces, General Phillip Valerio Sibanda, senhengo yePolitburo yeZanu PF kunyange hazvo ivo vachiri kushanda basa ravo rechiuto.
VaMnangagwa vazivisa nezvekudomwa uku nhasi kumusangano weZanu PF wepagore uri kuitwa kuGweru.
Asi vanoongorora zvematongerwo enyika vachidzidzisa paTswane University of Technology kuSouth Africa, Muzvinafundo Ricky Munyaradzi Mukonza, vanoti zvaitwa naVaMnangagwa kutyora bumbiro remitemo yenyika.
Muzvinafundo Mukonza vanoti bumbiro remitemo yenyika rinoti mushandi wehurumende haafanirwi kupinda mune zvematongerwo enyika kana achiri pabasa.
Vachitaura pamusangano mumwechetewo, VaMnangagwa vakurudzirawo nhengo dzebato ravo pamwe nevavanodyidzana nawo kuti vawedzere mabasa ekutsvaga rutsigiro mumatunhu akatarisana nesarudzo dzema by-election mwedzi unouya nemuna Zvita.
Muna Mbudzi kune sarudzo dzeby-election kuGutu West, kuchitiwo muna Zvita kuchiitwa sarudzo mumatunhu enhengo gumi neshanu dzeCCC dzakadzingwa muparamende naVaSengezo Tshabangu, avo vari kuzviti ndivo vakafanobata chigaro chemunyori mukuru webato iri.
Your browser doesn’t support HTML5
Hurukuro naMuzvinafundo Ricky Munyaradzi Mukonza